Г.Эрдэнэтуяа: Стратегийн орд эзэмшигчидтэй хийж буй хэлцэлд ажиглагчаар оролцох хүсэлтэй байна

Өнөөдөр /2025.09.22/ Монголын уул уурхайн үндэсний ассоциациас стратегийн орд газруудыг төрд авах асуудлаар мэдээлэл хийлээ. 

Энэ үеэр МУУҮА-ын Гүйцэтгэх захирал Г.Эрдэнэтуяа “Үндсэн хууль, Ашигт малтмалын тухай хуулиудын нэмэлт өөрчлөлт 2019-2024 онд хийгдсэн. Ингэхдээ хууль буцаж үйлчлэх эсэх дээр тодруулга хийгээгүй. Тэгэхээр хууль эрх зүйн үндсэн зарчмаар, хуулийг буцааж үйлчлүүлэх маягаар нэгэнт хэлцэл нь хийгдэж, хөрөнгө оруулалтаа татаж, үйл ажиллагаагаа жигдрүүлсэн ААН-үүдтэй дахин хэлцэл хийх гээд байгаа нь буруу.

Түүнчлэн дэлхийд байхгүй стратегийн орд гэх нэр томъёог ашигладаг нь уул уурхайн салбарт гадаадын хөрөнгө оруулалт татах боломжийг багасгаж байна. Тиймээс төрөөс стратегийн орд эзэмшигчидтэй хэлцэл хийж байгаа эдгээр өдрүүдэд, манай байгууллагаас шат шатанд нь хөндлөнгийн ажиглагч байдлаар оролцох хүсэлтэй байна. Энэ хүсэлтээ холбогдох байгууллагад хүргүүлнэ. Ажиглагч байдлаар оролцсоноор уул уурхайн компаниудын эрх ашгийг хамгаална.

Хууль эрх зүйн орчин нь тогтворгүй, байнга өөрчлөгддөг энэ байдал гадаадын хөрөнгө оруулалтыг улам бүр багасгаж байна” гэж ярилаа.