Ж.Оджаргал: Ухаа худаг ордыг ямар ч маргаангүй хууль номын дагуу авсан

MCS группийн үүсгэн байгуулагч, захирлуудын зөвлөлийн дарга Ж.Оджаргалаас Ухаа худаг орд болон цаг үеийн асуудлаар мэдээлэл тодрууллаа. 

Тэрээр "2008 онд Тавантолгойн бүлэг орд гэх стратегийн орд, УИХ-аар батлагдсан байдаг. Тэр хүрээнд тухайн үеийн Засгийн газартай Тавантолгойн бүлэг ордын төрийн эзэмшлийн 9 удаагийн хэлэлцээр хийж, үр дүнд нь бид нар Эрдэнэс Тавантолгойн өнөөдөр эзэмшиж байгаа буюу тухайн үеийн Тавантолгойн 6 лицензийн тавыг нь төрд өгсөн. Энэ бол нийт нөөцийн 96 хувь. Үлдсэн 4 хувийн нөөц буюу Ухаа худаг гэдэг лиценз дээр бүтээн байгуулалт хийгээд 16, 17 жил болж байна. Ер нь стратегийн орд Тавантолгойн бүлэг орд гэж байдаг. Ухаа худаг гэдэг тусдаа стратегийн орд байдаггүй. Энэ бол Тавантолгойн бүлэг ордын нэг хэсэг нь. Үүн дээр тухайн үедээ Засгийн газартай хэлэлцээр хийгээд хуулийн хүрээнд төрд нийт эзэмшлийг 96 хувийг нь өгсөн. 

Ухаа худаг ордыг хууль бусаар авсан, ард түмний баялаг хулгайллаа гэдэг буруу ойлголт. Тэр бол худал мэдээлэл. Үүнийг зориудаар буруу мэдээлэл цацсан гэж ойлгож байгаа. Энэ бол төрийн бүх л байгууллагууд оролцсон, бүх яам, ажлын хэсэг гараад 4 сар хэлэлцээр хийгээд төрийн эзэмшлийг нь өгчихсөн байгаа. Энэ бол албан ёсны байгууллагад нь албан ёсны бичиг баримт байгаа. Тийм учраас стратегийн ордын хүрээнд тухайн үеийн хууль номын дагуу төсвийн хөрөнгөөр хайгуул хийсэн тохиолдолд бол хувийн хэвшилтэй хамтарч эзэмшвэл 50 хүртэлх хувь байх ёстой гэсэн хуулийг давуулан биелүүлээд бид нар 96 хувийг нь өгчихсөн байгаа. Энэ бол ямар ч маргаангүй, хууль номын дагуу хийсэн гэрээ.

...Бид хуулийн хүрээнд хандив өгдөг. Түүнээс биш бусдад нөлөөлөх зорилготой байсан бол хандив өгөхгүй байсан. Намаас нь үл харгалзаад аль болох ард түмэн, нийгмийнхээ төлөө гэсэн нэр дэвшигчдэд өгч байсан болохоос биш хандив өгсөн хүмүүсээсээ юм гуйж үзээгүй, гуйх ч үгүй." гэж хэллээ.