Монгол Улсын Ерөнхийлөгч У.Хүрэлсүх энэ 09 дүгээр сарын 22-ны өдөр НҮБ-ын 80 жилийн ойн Өндөр түвшний хүндэтгэлийн хуралдаанд оролцлоо
Энэхүү өндөр түвшний хуралдааны үеэр НҮБ-ын Ерөнхий нарийн бичгийн дарга Антонио Гутерреш хэлсэн үгэндээ дэлхийн дайны дараах хүнд цаг үед НҮБ байгуулагдах үеийн ажилтнууд нь дайны гамшгийг биеэр туулж, энх тайвны төлөө ажиллахаар шийдсэн хүмүүс байсан түүхийг эргэн дурсаж, хамтын ажиллагаа л ирээдүйг хамгаална гэдгийг тэд ухамсарлаж байсныг онцлов.
Өнгөрсөн 80 жилийн хугацаанд НҮБ хүн төрөлхтний олон том ололт амжилтыг удирдан чиглүүлсэн ч өнөөдөр НҮБ-ын Дүрэм, олон улсын эрх зүйн хэм хэмжээ зөрчигдсөн хэвээр, дэлхий даяар дайн, зэвсэгт мөргөлдөөн, өлсгөлөн, уур амьсгалын хямрал, олон туйлт байдал зэрэг олон сорилтууд тулгарсан хэвээр байна. Энэ цаг үед НҮБ-ын Дүрэм, зарчмуудыг хамгаалж, бэхжүүлэх нь урьдын адил чухал хэвээр байгаа бөгөөд илүү үр дүнтэй хамтын ажиллагаа, нэгдсэн хариу арга хэмжээ авах шаардлагатай байгааг сануулан, энэхүү түүхэн мөчид ухаалаг, зоригтой, итгэлтэй байж, энх тайвны амлалтыг биелүүлье хэмээн уриалав.
НҮБ-ын Ерөнхий Ассамблейн 80 дугаар чуулганы дарга Анналена Бэербок НҮБ-ын 80 жилийн ой нь тэмдэглэлт баяр ёслол бус, харин дэлхийн хоёр дайны сургамжыг эргэн санаж, өнөөгийн дайн, уур амьсгалын өөрчлөлт, хямралуудыг шийдвэрлэхэд эв нэгдэл, олон талт хамтын ажиллагааг сэргээх чухал цаг үе хэмээн онцлов. Тэрээр НҮБ зөвхөн байгууллага бус, харин итгэл найдварыг бодит үйл хэрэг болгохын төлөө ажиллаж буй хүмүүсийн хүч чармайлт гэдгийг тэмдэглээд 80 дугаар чуулганы сэдэв болох “Хамтдаа хүчтэй” нь зөвхөн уриа төдий бус, хүнд сорилтод ч эв нэгдэл, яриа хэлэлцээг сонгох бодит амлалт хэмээн уриалав.
Түүнчлэн төр, нийгмийн зүтгэлтнүүд НҮБ-ын энх тайван, аюулгүй байдал, тогтвортой хөгжил болон хүний эрхийн асуудлаарх үүргийн талаар дүгнэлт хийн санал бодлоо хуваалцав. НҮБ-ын Ерөнхий Ассамблейн 80 дугаар чуулганы Ерөнхий санал шүүмжлэл 09 дүгээр сарын 23-ны өдөр Нью-Йорк хотноо эхэлнэ. Монгол Улсын Ерөнхийлөгч У.Хүрэлсүх энэ өдрийн үдээс хойших хуралдаанд үг хэлнэ.
