УИХ-ын дарга Д.Амарбаясгалан өөрийн нэр төр, алдар хүнд, ажил хэргийн нэр хүндийг гутаасан асуудлаар УИХ-ын гишүүн Б.Энхбаярыг шүүхэд өгчээ
Өнгөрсөн долоо хоногт улс төрийн талбар ширүүхэн маргаантай өнгөрөв. Эрх баригч намын шинэ даргын сунгаа тухайн намын нэр нүүр, хэн нь хэний хүн болох, хэнийг дэмждэг, хэнтэй тэрсэлддэг гээд олон зүйлийн учиг тайлагдах шиг болсон. УИХ-ын дарга Д.Амарбаясгалан, Ерөнхий сайд Г.Занданшатар ээлжлэн мэдэгдэл хийсээр парламентын гишүүд ч ажлаа хам, хум хийж, зарим нь чуулгандаа ч суугаагүй.
Ерөнхий сайдын бүрэн эрхээр ХЗДХ-ийн сайдад томилогдох гэж байгаа Б.Энхбаярын "амнаас" болж эхэлсэн энэ өрсөлдөөн түүнийг шүүхэд өгснөөр улам ширүүсэж байх шиг. Тодруулбал УИХ-ын дарга Д.Амарбаясгалан өөрийн нэр төр, алдар хүнд, ажил хэргийн нэр хүндийг гутаасан асуудлаар УИХ-ын гишүүн Б.Энхбаярыг шүүхэд өгчээ.
Энэ талаар түүний өмгөөлөгч З.Буяндаваа:
"Миний бие Улсын Их Хурлын дарга Дашзэгвийн Амарбаясгалангийн өмгөөлөгчөөр ажиллаж байна. Миний үйлчлүүлэгч Д.Амарбаясгалан нь өөрийн нэр төр, алдар хүнд, ажил хэргийн нэр хүндийг гутаасан асуудлаар Улсын Их Хурлын гишүүн Б. Энхбаярыг шүүхэд өгч, Баянгол, Хан-Уул, Сонгинохайрхан дүүргийн Иргэний хэргийн анхан шатны шүүхэд нэхэмжлэл гаргасан. УИХ-ын дарга Д.Амарбаясгалан нь “Админерал” гэх компанитай ямар нэгэн холбоо хамааралгүй болно. Сүүлийн гурван жилийн хугацаанд түүнийг “орд эзэмшиж, нүүрс хулгайлсан” гэх ташаа мэдээлэл удаа дараа түгээж байсан бол сүүлийн үед бүр хүн амины хэрэгт холбогдуулан гүтгэх хэмжээнд хүрээд байна. Гэвч дээрх асуудлуудаар Монгол Улсын аль ч хууль хяналтын байгууллага Д.Амарбаясгаланг шалгасан, мэдүүлэг авсан тохиолдол огт байхгүй. Иймд миний үйлчлүүлэгч Д.Амарбаясгалан нь өөрийн нэр төр, алдар хүнд, ажил хэргийн нэр хүндээ сэргээлгэхийн тулд шүүхэд нэхэмжлэл гарган хандсаныг албан ёсоор мэдэгдэж байна" гэжээ.
