Г.Занданшатарын шунал Засгийн газрыг унагаах уу?
МАН-ын даргын сонгууль эцэстээ төрийн зовлон болон хувирсан. Давсан болон унасан талууд бүтэн долоо хоногийн турш тасралтгүй мэдэгдэл, мэдээлэл хийх нэрээр камерын өмнө сууж харилцан бие бие рүүгээ үгэн сум нүүлгэсэн ч өнөөдрийг болтол асуудалд цэг тавьж чадаагүй хэвээр байна. Эцэст нь засаг унах бүр даамжирвал УИХ ч тарж мэдэх нөхцөлд байдалд тулж ирлээ.
Тэгвэл өнгөрсөн долоо хоногт УИХ-ын зарим гишүүдийн дунд Г.Занданшатарын тэргүүлсэн Засгийн газрыг огцруулах акц эхэлсэн бөгөөд энэ ажлыг УИХ-д шинээр бий болсон “Нийслэлийн фракц” зохион байгуулсан талаар эх сурвалж мэдээллээ. Тодруулбал УИХ-ын гишүүн П.Сайнзоригийн албан бланкан дээр Засгийг огцруулах гарын үсэг цуглуулж эхэлсэн. Өнөөдрийн байдлаар аль хэдийнэ 46 гишүүн гарын үсгээ зурсан гэв. Хэрэв үнэхээр УИХ-ын 46 гишүүн гарын үсгээ зурсан бол Үндсэн хуулийн 43 дугаар зүйлийн нэгдүгээрт заасны дагуу УИХ-ын гишүүдийн дөрөвний нэг нь бүрдсэн гэсэн үг. Тиймээс хуулийн дагуу гурав хоногийн дотор УИХ-д өргөн барих бөгөөд УИХ дээрх асуудлыг 10 хоногийн дотор хэлэлцэн шийдвэр гаргана. Мөн УИХ-ын гишүүдийн олонхи уг саналыг дэмжсэн бол Ерөнхий сайдыг огцорсонд тооцох бөгөөд шинэ Ерөнхий сайдыг УИХ 30 хоногийн дотор томилно хэмээн тодорхой заасан байдаг. Үүнээс үзвэл Г.Занданшатарын Засгийн газрын цаг аль хэдийн тоологдож эхэлсэн байна.
МАН-ын даргын сунгаанд өвдөг шороодсондоо шаралхаж стандарт бус томилгоо хийж намынхаа асуудал, талцлыг төрийн зовлон болгосон Г.Занданшатар энэ удаад Ерөнхий сайдын суудлаасаа огцорвол юун Ерөнхийлөгчийн сунгаа, улс төрийн карьер нь төгсгөл болно гэсэн үг. Тоо бодъё. УИХ-д суудалтай улс төрийн таван намаас бүрдсэн 126 гишүүний 68 нь МАН-ыг төлөөлж байгаа бол АН 42 гишүүн, ХҮН 6, ИЗНН 4 үлдсэн 4 нь Үндэсний эвслийг төлөөлж буй. ХҮН болон ИЗНН-ын тухайд МАН-ын даргаар сонгогдсон УИХ-ын дарга Д.Амарбаясгаланд баяр хүргэчихсэн. Харин Үндэсний эвслийн тэргүүн Н.Номтойбаяр баяр хүргээгүй ч аль хэдийнэ Г.Занданшатарын Засгийн газрыг “завсрын” гэж нэрлэсэн төдийгүй “хулгайч” сайд нараас бүрдсэн кабинет гэж тодорхойлсон зэргээс үзвэл Үндэсний эвсэл Засгийн эсрэг байгаа гэсэн үг. Өөрөөр хэлбэл УИХ-ын 14 гишүүн Засгийн газрыг огцруулахыг дэмжих дүр зураг харагдаж байгаа юм.
Харин АН-ын тухайд хуваагдмал байдалд орчихсон байгаа. Тэдний хувьд намын даргын суудлаа авчихвал Г.Занданшатарын Засгийн газартай хамтрах яриа хэлэлцээр хийсэн талаарх мэдээлэл ч хэвлэлд ил болсон. Гэвч тэдний хэлэлцээр талаар болсон тул шүд зууж байх магадлал өндөр. Мөн угаас Женко Х.Баттулга, О.Цогтгэрэл, Лу.Гантөмөр гэж хуваагдсан байсан АН-ын 42 гишүүнээс 20 орчим нь Засгийн газрыг унагахаар санал өгөх нь тодорхой. Ингээд бодохоор УИХ-д суудалтай улс төрийн таван намын гурваас 34 гишүүн бүрдэж байна. Багцаагаар бодоход дээрх 34 гишүүн дээр МАН-ын 68 гишүүнээс хэд нь Ерөнхий сайдыг хорхойтой араандаа зуусан байгаа нь нэгэнт ил тод болчихсон.
Тиймээс энэ удаагийн Засгийн газар унах нь бараг тодорхой болчихсон гэж хэлж болохоор дүр зураг харагдаж байгаа юм. Гагцхүү үүнээс өмнө Г.Занданшатарын аз таарч хэлэлцээр хийж чадвал аль алинаас нь урвуулах боломж бий. Гэхдээ шилний цаанаас чихэр долоолгодог технологид бага ангийн хүүхэд ч хууртахаа больсон тул найдвар тун бага. Юутай ч Ерөнхий сайд хувийн шунал хүсэлдээ хөтлөгдөн хэт иш мухаргүй аашилсан дээр нь шударга ёсны илдээрээ буруу хүнээ сонгосоноороо Засгийн газрынхаа хойдохыг өөрөө уншчихлаа. Гэвч хормой шуух болоогүй байна. Улсын нэгдүгээр хүн, Том ах гэж нэг хүн бий. Тэрээр өнөөг хүртэл байр сууриа илэрхийлээгүй байгаа. Хэрхэн юу бясалгаж, төлөвлөж суугаа нь сонирхолтой.
Х.Бумаа
