Үндэсний эвсэлийн тэргүүн Н.Номтойбаярын “зэвүүн” зөгнөл: Г.Занданшатар бол өөрийн эрх мэдэлгүй Ерөнхий сайд. Өөрийн эрх мэдэлгүй Ж.Эрдэнэбатын кабинетад ажиллаж байсан хүний хувьд ийм засаг хамтрахгүй!
Төрийн ордонд улс төр “шатаж” байна. Ах намын өндөр албан тушаалтнууд бие бие рүүгээ тэсрэх бөмбөг авч шидэх нь холгүй явна. Энэ үйл явц Ерөнхий сайд Л.Оюун-Эрдэнэ суудлаасаа бууж, парламентын гадна явсан Г.Занданшатар халааг нь авснаас эхтэй.
Улмаар тэрээр Монгол Улсын 34 дэх Ерөнхий сайд болоод зогсохгүй намын дарга болно хэмээн зүтгэсэн. Гэвч намын даргын сунгаан дээрээ завгүй 100 хоногийн тайлангаа бахдан тавьсан. Харамсалтай нь намын даргын сонгуульд өвдөг шороодсон. Арга ч үгүй биз. Намын даргын сонгуулийн өмнө цаашид намдаа ямар өөрчлөлт шинэчлэл хийж, сонгуульд хэрхэн ялалт байгуулах бодлого төлөвлөлтөө ярихаас илүүтэй 100 хоногийн завгүй өдрүүдээ яриад зогсож буй түүнд итгэл үзүүлэх гишүүд цөөн байсан бололтой. Харин түүний эсрэг УИХ-ын дарга Б.Амарбаясгалан өрсөлдөж үүр шөнийн заагаар ялалт байгуулж тамгаа гардаж авсан.
Ингээд тэдний улс төрийн зодоон ил цагаандаа гарсан байдаг. Энэ үеэр Ардчилсан нам МАН-ын зодооныг баясан харж далимаар нь чуулганыг “самарч” улсын ажлыг зогсоох тийш нь хэлбийлгэв. Харин шинэ Засагтай хамтарсан ХҮН, ИЗНН-ууд ажин түжин.
Тэдний дундаас “Завсрын Засгийн газартай хамтрахгүй” түс тас мэдэгдсэн Н.Номтойбаяр харин няхуур гэгч нь ажиглаж байх шиг. Түүний таамаг биелэлээ олох магадлал ч тун чиг ойрхон байна.
Тодруулбал, өнгөрсөн зургаадугаар сард Ерөнхий сайд Г.Занданшатар Засгийн газраа байгуулахдаа УИХ-д суудалтай ХҮН, ИЗНН, Үндэсний эвсэлтэй хамтрах хүсэлтэй байгаа саналаа хүргүүлсэн. Энэ дагуу Засгийн газарт хамтрах урилга авсан намууд эхнээсээ шийдвэрээ гаргаж улмаар ХҮН, ИЗНН-ууд саналыг хүлээн авсан байдаг.
Харин Үндэсний эвсэлийн тухайд тус саналаас татагалзсан.
Энэ талаар Үндэсний эвслийн тэргүүн, УИХ-ын гишүүн Н.Номтойбаяр хэлэхдээ, “Би ямар ч тохиолдолд нэг сайдын сэтэр авахын тулд сайд л болж байвал юу ч хийсэн яах вэ гэж гүйж явдаг хямдхан улстөрч биш гэдгээ хэлчих нь зүйтэй байх. Ажил үүргийн хүрээнд тодорхой асуудал хариуцлаа гэхэд үр дүн гарах ёстой.
Хоёрт нь, Г.Занданшатар Ерөнхий сайд маань УИХ-ын гишүүн биш, улс төрийн эрх мэдэл байхгүй. Зүйрлэж хэлэх юм бол улс төрийн эрх мэдэлгүй Ж.Эрдэнэбатын кабиентад би ажиллаж байсан. Үнэнийг хэлэхэд, Засгийн газрын тэргүүн улс төрийн эрх мэдэлгүй байх нь ажил урагшлуулахад маш хүндрэлтэй байдаг. Монголд өнөөдөр улс төр төдийлөн хөгжиж, ёс зүйн хэм хэмжээ, сахилга бат, үүрэг хариуцлагын хувьд бусад хөгжилтэй улс орны улстөрчидтэй харьцуулахад хол хоцрогдолтой явж байгаа. Ерөнхий сайд Г.Зандашатарт улс төрийн эрх мэдэл одоогоор алга. Зүгээр нэг завсрын засгийн газар бүрдэх гэж байгаа бол би засагт орохгүй” гэж байв.
Н.Номтойбаярын хэлсэнчлэн Г.Занданшатар үнэхээр л улс төрийн мэдэлгүй Ерөнхий сайд. Ядахдаа Их хурлынхаа сонгуульд ялалт байгуулчихсан бол ингэж хэлэгдэхдээ хүрэхгүй байв. Түүнд харин нэг л зүйл бий. Төрийн тэргүүний дэмжлэг. Энэхүү дэмжлэгээр хаа хүртэл явахыг харах л үлдлээ.
Н.Номтойбаярын тухайд 80-аад оны төлөөлөл, баян айлын өв залгамжлагч, бие даасан эвсэлийн тэргүүн хамгийн чухал нь юм үзсэн толгой.
Тийм ч учраас ИЗНН-ын дарга Б.Батбаатар шиг цэцгэн настай, толгойгүй засагт хамтраагүй нь магад өнөөдрийн улс төрийн бужигнааныг зөгнөж байсных болов уу гэж уншигдаж байгаа юм.
Хэрэв үнэхээр улс төрийн бужигнаан энэ хэвээр үргэлжилбэл, Г.Занданшатарын Засгийн газар унах эрсдэл өндөр байна.
М.Үүрийнтуяа
