Гараад ирээч Ерөнхийлөгч өө? Гадаа хүйтэн байна ...
Д.Амарбаясгалан аргагүй МАН-ын 300 мянга гаруй гишүүд дундаа нэр нөлөөтэй юм байна. Түүнийг МАН-ын даргаар ядах юмгүй сонгогдохыг бид харлаа, үзлээ. Гэвчиг Б.Энхбаяр нөгөө талаас тавьсан “сум”. Г.Занданшатар түүнийг Хууль зүй дотоод хэргийн сайд болгосон бол Д.Амарбаясгалан хариуд нь намын гишүүдийг удирддаг бяраа харуулж МАН-ын гишүүнээс хөөв.
Эргүүлээд Б.Энхбаярыг хөөхгүй л юм бол Хяналтын хороон дарга Б.Баярбаатарыг бүр даргаас нь огцруулах асуудал яригдаж байна. Г.Занданшатарыг тойрогтоо ялагдсаныг дурсахаас өмнө УИХ-д 4 дараалж сонгогдсоныг, Монголын төрд хамаг л том албан тушаалыг сорчлон ажилласан азтай одтой аавын хүү гэдгийг хэн ч дурсахгүй байна. Бас 2025 оны зургадугаар сард засгаа аваад наадамд нутгийн бөх, морь нь түрүүлж үнэхээр л түүний он цаг ирсэн мэт, өөрийнх нь хэлдгээр оюун санааны их ялалт ялгарлын мөч тохиосон мэт байсан даа.
Өөр нэг чухал сэдэв. Энэ богино хугацаанд Г.Занданшатарын Засгийн газар төсвийн алдагдлыг нөхөж чаджээ. 40 хоногийн дотор 80 тэрбумын орлого төвлөрүүлсэн, он дуусах үед 130 тэрбумд зорьж буй, 200 тэрбум ч болж болох талаар Г.Дамдинням сайд мэдээллээ. Ард түмэндээ 1072 хувьцааны ногдол ашгийг өгөх гээд эв зүйг нь олоод зүтгээд л байгаа юм байна гэж ард түмэн сэртэсхийн Г.Занданшатар руу эргэж харлаа. Г.Занданшатарыг огцруулах бичгийг СХД-ээс сонгогдсон Х.Нямбаатарын “пороро” П.Сайнзориг барьчихсан гарын үсэг цуглуулж явна. Цаст уулын цагаан арслан цаг нь болохоор шоргоолжинд баригдана аа гэж энэ. Нийслэлийн МАН-ын хороо гэж мөсөн уул байж байна.
Энэ мөсөн уулыг мөргөөд Г.Занданшатар “Титаник” шиг живэх үү тойроод гарах уу? Нийслэлийн МАН-ын хорооны эзэн хаан нь Х.Нямбаатар. П.Сайнзориг эрэг шураг л төдий юм. Шинэхэн гишүүнд ялгуусан түүхэн үйл явдал намтартаа нэмэх ховорхон тохиол гэчихсэн гүйж явна л даа. Д.Амарбаясгалан нүд нь эргэлдэж ихэд сандарсан байдалтай мэдэгдэл хийсэн, өнгөрсөн 7 хоногийн сүүлчээр. Найзыг нь ч хориод өөрийг нь ч хүн амины хэрэгт гүтгээд товчхондоо тахимаа өгчихгүй байгаад бухимдаж байна. МАН заалнаас дарга болж гарч ирсэн 80-аад оны залуусаа нэг их дээш нь гаргадаггүй. Одоогийн Дундговийн Засаг дарга тээр жил хотын даргаар заалнаас сонгогдсон ч сул талаар нь дайрч унагаад зогсохгүй намаасаа хөөж байв даа.
Гэвчиг хэсэг хугацааны дараа эргүүлэн авдаг л нам. Б.Энхбаяр ярсхийтэл нэг хүн мэт гараа өргөсөн гишүүдийн саналаар хөөгдсөн ч тэнгэрийн муу арилж намдаа эргэн орох нь цаг хугацааны асуудал. Эцсийн эцэст Ерөнхийлөгч У.Хүрэлсүх ганц үг хэлээд л энэ бүх байдал эмхэндээ орох учиртай. Түүнээс наана хэнбугай ч шийдэхгүй. Гараад ирээч Ерөнхийлөгч өө, гадаа гадаад орон шиг байна шүү. Энэ бүх гацалтыг арилгахгүй бол өвөл хүйтэн болно.
