МАН-ын томчуудын зодооны хохирогч Л.Мөнхбаатарын “гомдол”
Мөнчигрөөрөө явж байгаад МАН-ын томчуудын зодооны хохирогч болсон Л.Мөнхбаатар төрийн ордонд мэдээлэл хийгээгүй үлдсэн ганц хүн болох нь. Сайдын сэнтийгээсээ учир шалтгаангүй хөөгдөж буй тэрбээр олон өдөр таг чимээгүй явна. Өнгөрсөн долоо хоногийн Засгийн газрын хуралдаа ч суугаагүй гэх бор шувуу жиргэж байна.
Гэхдээ хуулиндаа Засгийн газрын сайд нарыг солих нь Ерөнхий сайдын бүрэн эрхийн асуудал. Өнгөрсөн Засгийн газруудад ч түүн шиг богино настай сайдууд цөөнгүй байсан. Тухайлбал,
- “Улны айл” гэх шинэ нэршлийг бий болгосон Д.Сарангэрэл Хөдөлмөр нийгмийн хамгааллын сайдаар томилогдсоноос хойш 28 хоног ажиллаад огцорч байв.
Түүнийг Үндсэн хуулийн 14 дүгээр зүйлийн “Хүнийг үндэс, угсаа, хэл, арьсны өнгө, нас, шашин шүтлэг, нийгмийн гарал, албан тушаал, эрхэлсэн ажил, боловсрол, үзэл бодлоор нь ялгаварлан гадуурхаж үл болно” гэх үндэслэлээр Ерөнхий сайд захирамж гарган нэг өдрийн дотор огцруулж байв.
- 2017 онд Боловсрол соёл шинжлэх ухааны сайд асан Ж.Батсуурийг хариуцсан салбараа бүрэн зангидаж чадаагүй хэмээн үзэж жил хүрэхгүй хугацааны дараа огцоруулсан. Тэрээр 2016 оны долдугаар сарын 23-ны өдөр томилогдож байсан бөгөөд 10 сарын дараа огцорсон юм.
- 2022 онд БОАЖ-ын сайд Д.Уртнасанг ажиллах хугацаандаа агаарын бохирдолтой тэмцэх талаар дорвитой арга хэмжээ аваагүй, мэргэжлийн байгууллагуудаа чиг үүргээр нь хангаагүй зэрэг хүчин зүйлээс шалтгаалан ажлаасаа нь чөлөөлж байв. Түүний хувьд жил орчим сайдаар ажилласан.
- Зам Тээврийн Хөгжлийн Сайд Я.Содбаатарыг 2019 оны хоёрдугаар сарын 1-ний УИХ-ын ээлжит чуулганаар ажлаас нь чөлөөлж байв. Ингэснээр дөрвөн сарын хугацаанд л сайдаар ажилласан юм. Түүнийг ажлаас чөлөөлөх болсон үндэслэл нь жижиг, дунд үйлдвэрлэлийг хөгжүүлэх сангийн асуудалд нэр холбогдсон тул ёс зүйн хариуцлага хүлээлгэсэн нь энэ аж.
Дээрх кэйсүүдээс дүгнэж үзвэл ажлаа өгч байсан сайдуудын ихэнх нь үндэслэл шалтгаантай байжээ. Харин гагцхүү энэ танхимын Хууль зүйн сайд Л.Мөнхбаатар ямар ч шалтгаагүйгээр сайдын суудлаасаа буусан цорын ганц хүн болж байна. Тэгэхээр гомдох нь ч аргагүй биз ээ.
