Ерөнхийлөгч У.Хүрэлсүхийн фракцын шартай гишүүд

 МАН-ын даргын сонгуулийн үеэр УИХ-ын гишүүд болон Бага хурлын гишүүд хэнийг дэмжиж байгаагаа жигтэйхэн нууж хаагаад л ичингүйрч байв. Гэтэл сүүлийн хэд хоног МАН-ын хагарал улам ширүүсч цаг хугацааны эрхээр хэн нь хэнд “ажилладаг” нь ил болов.

Өөрөөр хэлбэл, хоёр талууд ээлж ээлжээр сүрэглэн гарч ирж тайлбар хийж, нэгнээсээ өрсөж гарын үсэг цуглуулж явна. Яг л уралдааны морьд шиг.

Тухайлбал, Өнөөдөр Ерөнхийлөгч У.Хүрэлсүхийн фракцынхан “бид хамтдаа” хэмээн ил цагаан инээмсэглэн гарч ирлээ. Тэд УИХ-ын дарга Б.Амарбаясгаланг суудлаас нь буулгах нэгдмэл зорилготой аж.

Товчхондоо бол төрийн ордон дотор “Засаг огцор” болон “Д.Амарбаясгалан огцор” гэсэн хоёр баг хэн нь ялахаа ясаа цайтал үзье гэдэг дээр ирснээ ил шулуухан илэрхийлчихлээ.

Эхлээд Еөк ахлагчтай “Д.Амарбаясгалан огцор” фракцийн нэрсийг энд сийрүүлье.

• Гадаад харилцааны сайдын өндөр албыг хамгийн олон жил хашиж буй Б.Батцэцэг. Тэр бол Ерөнхийлөгч У.Хүрэлсүхтэй хамгийн ойр байдаг хүн гэдгээ өөрөө ч нуухгүй хэлдэг нэгэн.  

• Ерөнхий сайд асан Л.Оюун-Эрдэнийн халааг авч Ерөнхийлөгч У.Хүрэлсүхийн хамгийн их хайр халамжийг хүртэж яваа азтай хүү Н.Учрал. Түүнийг Ерөнхийлөгч У.Хүрэлсүх улс төрд хөтөлж оруулсан гэгддэг. Хаана ч нуруу алддаггүй тэрбээр өнгөрсөн Ерөнхий сайдын үед ч кабинетын зарчим ярьж явсан бол одоо ч энэ зарчмаа ярьсаар яваа. Тэргүүн Шадар сайд Н.Учрал магадгүй МАН-ын дараагийн дарга болох өндөр магадалтай “тамга хөзөр” ч байж болох.  

• Ерөнхий сайд Г.Занданшатараас том шагнал авсан Б.Энхбаяр. Улс төрийн халуун шуурганаар уур уцаартаа багтаж ядсан Ерөнхий сайд эсрэг талаас ирэх хэл амыг үл ажран Б.Энхбаярыг Хууль зүйн сайдын албан тушаалаар шагнаж олныг ангайлгаж орхисон. Албан тушаалаа хашиж яваа Л.Мөнхбаатар сайд хүртэл шоконд орсон. Одоо ч гомдол нь тасраагүй яваа. УИХ-ын гишүүн Б.Энхбаяр анх Б.Амарбаясгаланг нүүрсний хулгайч гэдэг хэрүүлийн алимыг эхлүүлсэн үр нь билээ.  

• Соёлын сайд Ч.Ундрам, Батлан хамгаалахын сайд Б.Батлут, Аж үйлдвэр эрдэс баялгийн сайд Г.Дамдинням, ХХААХҮ-ийн сайд Ж.Энхбаяр  зэрэг шинэ сайдуудаар Ерөнхийлөгчийн фракц үргэлжилнэ. Шинэ сайдууд бялуугаа хүртсэн юм чинь бас эзнийхээ төлөө тэмцэх нь зүй ёсны хэрэг ээ.   

• Сүүлийн үед олны хайрыг татах болсон ЦХИХХ-ны сайд Э.Батшугар. Танхимынхан нь түүнийг боловсролтой, хүмүүжилтэй кандидат гэж магтдаг. Түүний аав Ерөнхийлөгч асан Н.Энхбаяр Ерөнхийлөгч У.Хүрэлсүхийн багт урваж гар барилцсанаас хойш Э.Батшугарын карьер жинхэнэ сум шиг хурдалж яваа.  

• Фракцын гишүүнээ өмөөрч намаасаа гарахаа айлгасан шинэ гишүүд.  УИХ-ын гишүүн З.Мэндсайхан. Мэргэжлийн гэх тодотголтой У.Хүрэлсүхийн Засгийн  газарт тэрбээр ХХААХҮ-ийн сайдаар томилогдож, улс төрд танигдаж эхэлсэн. Тиймдээ ч Ерөнхийлөгчийн хүн гэгддэг. Дараагийнх нь Д.Энхтүвшин МАН-ын жагсаалтад багтаж УИХ-ын гишүүнээр сонгогдсон. “MCS”-ийн Дэд ерөнхийлөгчөөр 25 жил ажилласан. Мөн “MCS”-ээс 15 тэрбум төгрөгийн авлагатай. 

• Мэдээж хуучин бууны хугархайнууд. Төрд олон жил бугшиж сайн муу, сайхан муухайгийн аль нь ч наалдахаа больсон сайдууд. Б.Дэлгэрсайхан, Б.Чойжилсүрэн гэх мэт. Угаасаа, Еөкийн фракцынхан эртнээс л 70-аад оныхноор багаа бүрдүүлж ирсэн.  

• Энд Ерөнхийлөгчийн төрсөн дүүг дурьдахгүй байж үл болно. УИХ-ын гишүүн Ухнаагийн Отгонбаяр. МАН-аас ахынхаа унаган тойрогт өрсөлдөж УИХ-ын гишүүн болсон.

МАН-ын хагарал зодоон ил цагаандаа гарч шадар цэргүүд нь рингэн дээр гараад ирчихлээ. Одоо Монголчуудын хэлдгээр зүгээр талцаад зодолдох л дутуу байх шиг. Ямартай ч хэрүүл, зодооноо яаралтай нэг талдаа багтаагаад төрийн ажилдаа орохгүй бол өвөл айсуй гишүүд ээ!

Бид “Засаг огцор” фракцид ямар гишүүд багтаж буйг уншигч та бүхэнд цувралаар хүргэх болно.

 

М.Үүрийнтуяа