Долоон саяын цалинтай С.Цэнгүүн гишүүн хүүхдийн мөнгийг “АД ҮЗЭВ”
Парламентын хамгийн балчир улс төрч С.Цэнгүүн ямар сэдвээр сенсаацлахаа харин чиг мэддэг нэгэн бололтой. Ордон дотор гарын үсэг цуглуулах марафон болж байх хойгуур “хүүхдийн мөнгө хасах” талаар ярьж олны анхаарлыг төвөггүйхэн өөр дээрээ аваад ирлээ.
Тэрбээр "Хүүхдийн мөнгийг болъё" гээд хэлчих зоригтой хүн байдаггүй. Хүүхдийн мөнгөнд 1 их наяд төгрөг зүгээр хэрэглээний зардал болоод л гарч байгаа. Дэлгүүрийн нэг тор дүүргэж чадахгүй хиймэл мөнгө” хэмээн шүүмжилсэн юм.
Өөрөө 7 саяын цалин авч, улаан хивсэн дээр гунхаж яваа цэмцгэр гишүүн Долоон буудал, Далан давхрын амьдарлыг яахан төсөөлөх билээ.
Хүүхдийн мөнгө бол эмзэг сэдэв. Багш, эмч нарын цалингийн асуудал хурцаар яригдаж буй энэ үед хүүхдийн мөнгийг хөндөнө гэдэг гал дээр тос нэмж буйтай адил юм.
Нэгэн түүх сөхье. УИХ-ын 2004 оны сонгуулийн дараа тухайн үед 30 гаруйхан суудалтай байсан АН Хүний хөгжлийн сангийн тухай хуулийг санаачилж, Хүүхдийн 10 мянгыг олгодог болсон. Хоёр сонгуулийн дараа 20 мянга болгож, сүүлд МАН эрх барьж байхдаа цар тахлын үед 100 мянга болгосон байдаг. Энэ нь Ерөнхийлөгч У.Хүрэлсүхийн поп ажлуудын бас нэг онцлох нь гэж болно. Товчхондоо Хүүхдийн мөнгөний үндэс мөчрийг АН гаргаж ирсэн гэдгийг сануулах нь зүй.
Хүүхдийн мөнгийг ад үзээд амжилт олсон түүх гэж “үгүй”
Хүүхдийн мөнгийг танах асуудал өмнө яригдаагүй биш яригдаж байсан сэдэв
• 2022 онд Ерөнхий сайд асан Л.Оюун-Эрдэнэ, Сангийн сайд Б.Жавхлан нар “Халамжаас хөдөлмөр рүү, хадгаламжаас хуримтлал руу” хэмээх төсвийн бодлого хэрэгжүүлэхээ зарлаж байв. Энэ хүрээнд Засгийн газар Хүүхдийн мөнгийг хадгаламж хэлбэрт шилжүүлж насанд хүрэхэд нь нэг дор олгох, 100 мянган төгрөгийг бууруулж 20 мянган төгрөг болгох тухай асуудлыг ч хөндсөн удаатай. Гэвч тухайн үедээ хүүхдийн мөнгийг хуримтлал болгох нь хүний суурь эрхэд халдаж байгаа үйлдэл хэмээн нэлээдгүй шүүмжлэл дагуулж байсан.
• Өнгөрсөн зургаадугаар сард иргэн Б.Баасандорж Хүүхдийн мөнгийг болиулж "Сургууль, цэцэрлэг шинээр барих, багш нарын цалин нэмэх"-д зарцуулах талаар цахим өргөдөл санаачилж байв. Энэ санаачилга ч мөн үр дүнд хүрээгүй байдаг.
• 2024 оны 10 сард УИХ дахь Ардчилсан намын бүлгийн нэр бүхий гишүүд "Хүүхэд хөгжлийн карт" олгох хуулийн төслийг боловсруулж, УИХ-д өргөн барихаар зэхэж байсан. Тодруулбал, 6-18 насны хүүхдүүдийг соёл, спортын сургалтад хамруулах зорилгоор сар бүр 30 мянган төгрөгийн дэмжлэгийг төрөөс үзүүлнэ гэсэн заалтыг төсөлд тусгасан байдаг. Гэвч Улс төрийн хүрээнд уг шийдлийгАрдчилсан нам орон нутгийн сонгуулийг угтаж иргэд, сонгогчдын итгэлийг олж, оноо авах гэсэн арга хэрэгсэл гэж шүүмжилсэн бол харин эдийн засагчид төсвийн зардлыг томруулсан, эрсдэл бүхий тооцоололгүй "поп" амлалт хэмээн үзэж байв. Ингээд энэ төсөл бас л амжилт олоогүй.
Энэ мэтчилэн хүүхдийн мөнгийг өөр арга хэлбэрээр олгох гэсэн, танах гэсэн олон арга хэлбэрүүд ихэвчлэн бүтэлгүйтэж ирсэн. Нурж унадаг гэсэн үг. Учир нь манай улсад хүүхдийн мөнгөөр амьдарлаа залгуулдаг олон зуун мянган айл өрх байдгийг нуух юун. Эцэст нь хэлэхэд Монгол улс одоохондоо ядуурлаас ангижраагүй байна. Үнийн хөөрөгдөл дээр нэмээд цалин хөлс нь амьдралд хүрэлцэхгүй байгаа эдгээр хүнд өдрүүдэд Хүүхдийн мөнгийг хасах асуудал яривал иргэд уурсах нь тодорхой. Нэг үгээр, цаг нь болоогүй гэсэн үг юм.
М.Үүрийнтуяа
