Д.Амарбаясгалангийн фракц: Галзуу барын аманд гараа хийхээс буцахгүй залуу гишүүд
УИХ-ын даргын фракцид залуу гишүүд илүүрхэж байна. Ёстой нөгөө галзуу барын аманд гараа хийхээс буцахгүй нөхдүүд. Ялалтын туг атгахын төлөө улайрч байгаа хэдий ч угтаа тэдний хөндөж буй сэдэв нь чухал. Ямартай ч Д.Амарбаясгалангийн фракц өрсөлдөгчөөсөө нэг алхамаар түрүүлж байгаа. Учир нь өчигдөр /2025.10.07/ Ерөнхий сайд Г.Занданшатарыг огцруулах саналаа УИХ-д албан ёсоор хүргүүлсэн.
Бид өмнөх нийтлэлээр Ерөнхийлөгч У.Хүрэлсүхийн фракцын гишүүдийн мэдээллийг хүргэсэн. Харин одоо Д.Амарбаясгалангийн фракцын гишүүдийг товч базъя.
- Хэвлэл мэдээллийнхэн рүү жаахан шатсан ч залуу насны халуун цус нь булгилаж яваа хуульч П.Сайнзориг. Түүнийг улс төрийн хүрээллийнхэн төдийгүй хууль зүйн салбарынхан сайн хуульч хэмээн хэдийнэ хүлээн зөвшөөрсөн. Угаас хуулийн хүрээнд гэж ярих дуртай тэрээр энэ удаад уурсан, улайран тэмцэж, гол дүр бүтээж буй. Өрсөлдөгч тал түүний энэ байр суурийг сайдын суудал горилж хэмээн харлуулж буй. Үнэндээ тэрээр Хууль зүйн яаманд мэргэжилтнээс Төрийн нарийн хүртэл дэвшиж, тавилга болтлоо ажилласан нэгэн. Бурууд нүд хурц тэрээр энэ удаад АМНАТ-ын асуудлыг хөндөж шүгэл үлээсэн нь ядахдаа л барьцтай, хуулийн гарц гаргалгаатай асуудлаар Засгийг огцруулах гэж буйгаараа нөгөө талаас тохой илүү юм. Чухам энэ асуудлаараа өнгөрсөн амралтын өдрүүдээс эхлэн Засгийн газрыг огцруулах санал гаргаж гарын үсэг цуглуулж УИХ-д хүргүүлээд байна.
- УИХ-ын гишүүн А.Ариунзаяа. Түүний хувьд фракцынхаа хамт олон дундаа арай удаан улс төрийн халуун тогоонд буцалж яваа туршлагатай кандидатын нэг. Цагтаа Хөдөлмөр нийгмийн хамгааллын сайдаар хүртэл ажиллаж явсан удаатай. Тэрбээр МАН-ын бага хурлын өмнө ч Б.Амарбаясгаланг дэмжиж буйгаа ил цагаан зарлаж явсан. Г.Занданшатарын Засгийн газрыг огцруулах саналтай байгаа УИХ-ын даргын фракцын нэгэн тод өнгө юм.
- Эзнээ өмөөрч Б.Энхбаярыг шөнө дөлөөр намаасаа хөөсөн Б.Баярбаатар. Түүний хувьд УИХ-ын гишүүн бөгөөд Ёс зүйн дэд хорооны дарга. Эрх мэдлийнхээ хүрээнд МАН-ын даргын сонгуулийн дараа МАН-ын Хяналтын ерөнхий хороог хуралдуулж Б.Энхбаярыг намаасаа хөөсөн юм. Ингээд улс төрийн зодоон илүү даамжирсан гэж хэлж болно.
- Сүүлийн өдрүүдэд боловсрол, мэдлэгээрээ олны анхаарлыг ихэд татаад байгаа УИХ-ын гишүүн Г.Лувсанжамц. Түүнийг Засгийн газрыг огцруулах саналд гарын үсэг зурсанд багагүй хүн мэл гайхсан. Гэтэл хариуд нь, “МАН-ын Бага хурлын үеэр Д.Амарбаясгалан нэр дэвшигчийг дэмжсэн. Учир нь, яамдын тоог 12 хүртэл болгож цөөлнө, агентлаг болон төрийн өмчит байгууллагын тоог 30 хувиар цөөлнө гэсэн. Би энэ асуултыг Г.Занданшатар нэр дэвшигчээс асуусан, тодорхой хариулт байгаагүй. Би бол төр цомхон байх ёстой, төрийн өмчит байгууллагын завхайрлыг арилгах ёстой. Ингэж байж багш, алба хаагчдын цалин, тэтгэврийг нэмнэ” хэмээн ухаантай гэгч нь товч бөгөөд тодорхой хариултыг чулуудчихав. Залуу гишүүд ч донжтой байна шүү.
- УИХ-ын гишүүн Э.Болормаа, Х.Баасанжаргал, О.Саранчулуун, М.Мандхай тэргүүтэй шинэ гишүүд. Тэд парламентад анх удаа сонгогдсон хэдий ч нэр мөр хоёр нь харагддаггүй гишүүдийг бодвол дуу хоолойгоо олонд хүргэдэг хүмүүс. Холбоо хамааралын тухайд онцолбол, УИХ-ын гишүүн Х.Баасанжаргал “Админерал” компаниас хувьцаа эзэмшдэг гэх яриа байдаг.
Залуу гишүүд хүчтэй, зоригтой байна. Асуудал хэрхэн намжихыг үл мэдэх ч тэд хэнд ч бууж өгөхгүй гээд нэгэнт шийдчихэж. УИХ-ын гишүүн Г.Лувсанжамцын хэлдгээр “Ах нар хэзээ эморч дуусах юм бол доо”. Ард нь бүхэл бүтэн улсын төсөв тэднийг хүлээж байна. Дээрээс нь, өвөлжилт хэцүүдэх нь.
М.Үүрийнтуяа
