УИХ-ын Ерөнхий нарийн бичгийн дарга Б.Баасандорж цаг үеийн асуудлаар мэдээлэл өглөө.
Тэрбээр "Өнөөдрийн чуулганы нэгдсэн хуралдаанаар үндсэн гурван асуудал хэлэлцэж байна. УИХ-ын даргын дэргэдэх зөвлөл хуралдаад маргаашийн УИХ-ын чуулганы хуралдаанаар хэлэлцэх асуудлыг өөрчилсөн.
Баасан гарагийн өглөө 08:30 цагт Төрийн байгуулалтын байнгын хороо хуралдаж, П.Сайнзориг нарын 50 гаруй гишүүдийн тавьсан саналыг хэлэлцэнэ. Үргэлжлүүлэн 10:00 цагт УИХ-ын нэгдсэн чуулган хуралдаж, Ерөнхий сайд Г.Занданшатарыг огцруулах эсэх асуудлыг хэлэлцэнэ. Үүний дараа 2026 оны төсвийн төслийн хоёр дахь хэлэлцүүлэг болно. Аль ч намын бүлэг тухайн асуудалд завсарлага авах эрх нь Дэгийн тухай хуульд байгаа. Гэхдээ цаг хугацаатай, шийдвэрлэх хугацаа заасан асуудалд завсарлага арай өөрөөр явдаг.
Даргын дэргэдэх зөвлөл дээр Б.Энхбаяр гишүүнийг Хууль зүй, дотоод хэргийн сайдаар томилох асуудлыг ярилцсан. МАН-ын бүлгийн даргаас санал оруулж, Ерөнхий сайдыг огцруулах эсэх асуудлыг шийдсэний дараа Засгийн газрын гишүүнийг томилох эсэх асуудлыг шийдвэрлэх нь зүйтэй гэсэн. Тиймээс УИХ-ын даргын дэргэдэх зөвлөлийн нийт гишүүд шийдвэрлэснээр маргаашийн хэлэлцэх асуудлаас хасагдсан" гэв.
