Нууцаас гарсан нүүрсний гэрээ Д.Амарбаясгаланг бус Г.Занданшатарыг “намнах” уу?

Өчигдөр хуралдсан Засгийн газрын ээлжит хуралдаанаар нүүрсний оффтейк гэрээнүүдийг улсын нууцаас гаргасан. Ингэснээр нүүрсний хулгайн хэрэгт оролцсон улс төрчдийг ил болгож тэдэнд хариуцлага тооцох асуудал сөхөгдөнө гэсэн хүлээлт байв.

Улсын нууцад авсан байсан нүүрсний 39 гэрээнээс 31 нь “Бодь” группэд хамаарч байгаа юм. Энэхүү нууц гэрээнд туссанаар “Бодь групп” дангаараа 22.5 сая тонн нүүрсний гэрээ байгуулснаас 8.2 сая тонныг нь өмнөд хөрш рүү экспортолсон аж.

“Бодь” группын эзэн нь Д.Баясгалан. Д.Баясгалан нь УИХ-ын гишүүн Х.Баттулгыг Ерөнхийлөгчийн алба хаших хугацаанд хамгийн их ойр нөхөрлөж, улмаар Засгийн газраар дамжуулан нүүрсний экспортын төмөр зам барих шийдвэрийг гаргуулж байсан баримтууд ийнхүү дэлгэгдлээ.

Хамгийн сонирхолтой нь нууцаас гарсан уг гэрээнүүдийн он сар дарааллыг авч үзвэл өнөөгийн Ерөнхий сайд Г.Занданшатар УИХ-ын даргаар ажиллаж байхад хийгдэж, нууцын зэрэглэлд авагджээ. Өөрөөр хэлбэл Үндэсний Аюулгүй Байдлын Зөвлөлд төрийн гурван өндөрлөг буюу Ерөнхийлөгч, Ерөнхий сайд, УИХ-ын дарга гурав багтдаг билээ.

 Дээрх нүүрсний гэрээнүүдийг ил тод болговол нүүрсний хулгайн жинхэнэ эзэн холбогдогч нь Д.Амарбаясгалан гэж олон нийтэд итгүүлэх том баримт болно гэсэн хүлээлт байсан ч энэхүү хүлээлт ийнхүү талаар болж байна. Учир нь Д.Амарбаясгалангийн тухайд дээрх гэрээнүүд хийгдэх үед Үндэсний Аюулгүй Байдлын Зөвлөлд багтах албан тушаалтан биш байсан төдийгүй зарим гэрээ хийгдэх үед Засгийн газрын түвшинд ч ажиллаж  байгаагүй зэрэг нь түүнд “зохиомол” хэрэг тохох гэсэн санаархал байсан нь нотлогдож байгаа юм.

Нүүрсний оффтейк гэрээгээр Д.Амарбаясгаланг “намнах” гэсэн биш Ерөнхий сайд өөрөө “намнагдах” эрсдэлд орчихов уу гэдэг асуултын хариу ирэх өдрүүдэд тодорхой болно.

Юутай ч маргааш хуралдах УИХ-ын Төрийн байгуулалтын байнгын хорооны хуралдаан энэ бүх улс төржилтийн эхлэл тайз болно. Харин хуралдаанаа нээлттэй явуулах уу, хаалттай явуулах уу гэдэг л хамгийн чухал байна.  

Р.Ханджав

Эх сурвалж: mic.mn