УИХ-ын гишүүн Б.Энхбаярын эсрэг дугарсан Херогийн “няцаалт”
Б.Энхбаярын дэлгэсэн баримт улсын нууцаас гараагүй байсан уу
Ерөнхий сайд Г.Занданшатар УИХ-ын гишүүн Б.Энхбаярыг Хууль зүйн дотоод хэргийг сайдаар томилохоо зарлаад даруй 13 хонож байна. Энэ талаар Ерөнхийлөгчид танилцуулсан боловч УИХ дээр ирээд гацчихсан.
Хууль зүйн сайдаар томилогдсоныхоо дараа мэдээлэл хийнэ гэж байсан Б.Энхбаяр тогтож ядан байна. Тэрбээр өнгөрсөн амралтын өдрүүдэд хэд хэдэн ноцтой баримтыг дэлгэв.
Тодруулбал, “Хэро энтертайнмент” “Монгол хан“ жүжиг болон гадаад сурталчилгааг хийлгэхээр гадны PR компанитай хийсэн гэрээгээ нууцад авсан. Үүний санхүүжилт болох 7 тэрбум төгрөгийг “Эрдэнэс Оюутолгой“ компаниас гаргасан” тухай дэлгээд байна.
“Эрдэнэс Оюутолгой” компани нь Л.Оюун-Эрдэнийн Засгийн газрын шийдвэрийн дагуу гадаадын “Atticus Partners” Ltd болон “Atticus communications” Ltd компанитай дөрвөн удаагийн үйлдлээр нийт 1.9 сая ам.долларын (7 орчим тэрбум төгрөг) гэрээ хийсэн гэжээ. Энэ мөнгөөр "Хэро энтертайнмент" компанийн бүтээл “Монгол хаан” жүжгийн гадаад сурталчилгааг хийж, гэрээгээ тагнуулын байгууллагын шийдвэрээр нууцад авсан гэгдэж буй.
Тэгвэл үргэлжлүүлэн, “Монгол хаан” жүжгийн продюссер А.Баярцэцэг болон найруулагч Херо Баатар нар цахим хуудсаараа дамжуулан няцаалт хийгээд байна.
Тэрбээр хэлэхдээ, Манай төсөл Atticus Partners Ltd болон Atticus communications Ltd компанитай ямар нэг санхүүгийн харилцаанд ороогүй гэдгээ хариуцлагатай мэдэгдье. Уг компани манай улсыг сурталчлахдаа “Монгол хаан” төслийг ашигласан гэдэг тайлангаас хэсэгчилж авч биднийг 7 тэрбумын санхүүжилт авсан мэтээр нийгэмд ээлжит гүтгэлгээ тараалаа.
Манай төслийн зүгээс төр, төсөв, төрийн өмчит компаниудаар дамжуулан нэг ч төгрөг авч байгаагүй!
Япон улсын Токио, Нагояа хотуудад манай төслийн 100 гаруй уран бүтээлчид тоглолтоо хийж буй эдгээр өдрүүдэд улс төрийн ашиг хонжоо олох зорилгоор манай төслийн нэр хүндийг унагах, гүтгэх ажил хийж байгаад харамсаж байна!” гэжээ.
Хэрэв УИХ-ын гишүүн Б.Энхбаярын дэлгэсэн дээрх баримтууд үнэн бол энэ нь асар том хулгай. Үүнд холбогдох нэр бүхий албан тушаалтнуудад яаралтай хариуцлага тооцох нь зүй. Харин албан тушаал, эрх мэдлийн төлөө бусдыг гүтгэн харлуулж буй бол энэ нь Б.Энхбаярын уналтын цэг.
Учир нь Atticus Partners Ltd болон Эрдэнэс Оюутолгойн хоорондын гэрээг улсын нууцаас хараахан гаргаагүй аж. Атал эл гэрээг олон нийтэд ил болгосон нь түүнийг илүү том асуудалд ч оруулж мэдэх юм.
