Дээрээ суудлаа, доороо гүйдлээ олохоо больсон ТӨРИЙН ОРДОН
УИХ-ын мэдээллийг Засгийн газар нь тарааж байх жишээний. Монголчуудын хэлдгээр “цэр цээжиндээ, бөөр нь бөгсөндөө” гэгчээр тус тусынхаа ажлыг хиймээр байна.
Төрийн ордон дотор үргэлжилж буй улс төрийн зодоон нэгэнт утгаа алдаад байна. Хөл толгой нь мэдэгдэхгүй хэдэн хүмүүс нэг нэгнийгээ андаж тандаж явна. Сүүлдээ бүр хэн нь хэнтэйгээ тэмцээд байгаагаа өөрсдөө ч ойлгохоо больсон дүр зураг харагдаж эхэллээ. Энэ утгагүй байдлаас ард түмэн хэдийнэ залхсан. Ажлаа хийх төрийн ажилтан ч гэж байхгүй болсон.
Ямар сайндаа УИХ-ын дарга Б.Амарбаясгаланг огцруулах тухай тогтоолын төслийг УИХ-ын дэд дарга Б.Пүрэвдоржид өргөн барьж байгааг УИХ-ын хэвлэлийн алба нь мэдээгүй “ангайгаад” сууж байхад Засгийн хэвлэл нь уг мэдээг тарааж байх жишээний. Нэг нь хууль тогтоох засаглал, нөгөө нь гүйцэтгэх засаглал. Ихээхэн сүржигнэвэл гүйцэтгэх засаглал нь хууль тогтоох засаглалынхаа бүрэн эрх рүү халдсан увайгүйтэл юм.
Монголчуудын хэлдгээр “цэр цээжиндээ бөөр нь бөгсөндөө” гэгчээр тус тусынхаа ажлыг хиймээр байна.
Болсон явдал нь одоогоос 10 гаруй хоногийн өмнө төрийн ордонд хоёр төрлийн албан бичиг дээр гишүүдийн гарын үсэг цуглуулах марафон эхэлсэн. Нэг нь Ерөнхий сайд Г.Занданшатарыг огцруулах, нөгөө нь УИХ-ын дарга Б.Амарбаясгаланд ёс зүйн шаардлага хүлээлгэх агуулгатай хоёр бичиг байв.
УИХ-ын дарга Б.Амарбаясгаланг огцруулах бичгийг УИХ-ын гишүүн Д.Энхтүвшин зохион байгуулж, гарын үсэг цуглуулж эхэлсэн. Гэвч уриалж байгаа хүн нь MCS-ийн хөл гар гэх хэл аманд өртөж удалгүй тус фракц тэргүүлэгчээ сольсон.
Ингээд УИХ-ын гишүүн З.Мэндсайхан үргэлжлүүлэн УИХ-ын дарга Б.Амарбаясгаланг огцруулах албан бланкинд дахин гарын үсэг цуглуулсан байдаг. Улмаар УИХ-ын гишүүн З.Мэндсайхан, Д.Үүрийнтуяа, М.Бадамсүрэн нарын гишүүд УИХ-ын дарга Д.Амарбаясгаланг огцруулах тухай тогтоолын төслийг өчигдөр /2025.10.13/ 18.00 цагийн орчимд УИХ-ын дэд дарга Б.Пүрэвдоржид өргөн барьсан хэрэг.
Гэвч эл үйл явдалыг УИХ-ын албаны ямар ч албан тушаалтан мэдээгүй байсан гэх.
Ёстой нөгөө дээрээ суудлаа олохгүй бол доороо олохгүй гэгч болж байна.
М.Үүрийнтуяа
