МАН-ын Их хурлын хувь заяаг Ерөнхийлөгчийн экс хүргэн Б.Пүрэвдагва шийднэ
МАН 104 жилийн түүхэндээ хамгийн олон буюу 2255 төлөөлөгчтэй 31 дэх их хурлаа арваннэгдүгээр сарын 15-16-ны өдрүүдэд зохион байгуулах гэж байна. Хуралд оролцох төлөөлөгчдийг сонгох, зохион байгуулах нүсэр ажлыг СДМЗХ-ны Ерөнхийлөгч Б.Пүрэвдагва “базаж” буй.
Б.Пүрэвдагваас өмнө энэ байгууллагын Ерөнхийлөгчөөр Н.Учрал ажиллаж байв. Б.Пүрэвдагвын тухайд У.Хүрэлсүхийн экс хүргэн гэх алдраа аль эрт ажил хөдөлмөрөөрөө баллуурдсан. МАН-ын залуусын байгууллагыг зөв чиглүүлэхээр тэрбээр хичээж байгаа.
Өв залгамжлагчид л байдаг гэсэн ойлголт төрүүлэхүйц байсан СДМЗХ энэ удаагийн Удирдах зөвлөлд олны танилаас Г.Анархүү, Б.Гүнзаяа нарыг эс тооцвол ихэвчлэн энгийн ардын хүүхдүүд буй нь анхаарал татаж байгаа юм. Эрх мэдэлтнүүд өөрсдийн хүүхдүүдээ, гарын хүмүүсээ байршуулж намынхаа цусыг сэлбэдэг гэх муу нэр, луу данс нь Б.Пүрэвдагвын үед арилж ч мэдэхээр байна. Цаашилбал, Б.Пүрэвдагвын баруун гарт Б.Галсан, зүүн гарт “Хит”-ийн Д.Даваанямын хүү Д.Даваадорж түшиг тулгуур болж буй.
Эдгээр залуус удам судартаа томоохон улстөрч аав ээжгүй, цагаан цаас шиг цэвэрхэн намтартай ардын хүүхдүүд. Хэдийгээр намын залуучуудын байгууллагад ах нарын цүнх баригч энээ тэрээ гэсэн муу нэр луу данс байдаг ч үе нь тэр чигээрээ шинэчлэгдэж байгаа энэ үед эдгээр залуус өөр түвшнийх болох нь харагдаж байгаа нь олзуурхууштай.
