Б.Галбадрах: Өнөөдөр нэг ангид 35 хүүхэд сурах ёстой байтал 50–60 хүүхэдтэй ангиуд байна. Энэ бол өөрөө хуулийн зөрчил

Боловсрол шинжлэх ухааны үйлдвэрчний эвлэлийн холбооноос багш нар ажил хаяж байгаатай холбогдуулан хэвлэлийн бага хурал хийлээ.

Боловсрол, Шинжлэх ухааны үйлдвэрчний эвлэлийн холбооны ерөнхий боловсролын сургууль хариуцсан мэргэжилтэн Б.Галбадрах, "Өчигдөр Боловсролын сайд П.Наранбаярын хийсэн хариуцлагагүй мэдэгдэлд хэд хэдэн тайлбар хийхгүй бол болохгүй нь ээ. Яагаад гэвэл өнөөдөр бидний тэмцлийн үйл ажиллагааг саармагжуулах, хууль бус аргаар таслан зогсоох оролдлого төрийн шат шатны байгууллагаар дамжиж явагдаж байна. Тэр дундаа бүр анхан шатны үйлдвэрчний эвлэлийн хороодын дарга нарт хүртэл хандсан, дарамталсан шинжтэй үйлдэл гарч байгаа. Энэ бүхэнд бид эрс эсэргүүцэж байна.

Хууль бус эсэхийг шүүх л тогтооно. Тэрнээс биш хуулийг тайлбарладаг хүн бол Боловсролын сайд биш. Тиймээс энэ талаар би товчхон мэдээлэл өгье гэж бодлоо.

Бидний ажил хаялт бүрэн хууль ёсны тэмцэл юм.

Өнөөдөр нэг ангид 35 хүүхэд сурах ёстой байтал 50–60 хүүхэдтэй ангиуд байна. Энэ бол өөрөө хуулийн зөрчил. Багш, ажилтны хүрэлцээ маш хомс, 5000 орчим багшийн дутагдалтай байна. Үйлчлэгч, тогооч, бэлтгэгч олдохгүй, үлдсэн хүмүүс хоёр хүний ажлыг нэг нь хийж байна. Энэ бол хөдөлмөрийн мөлжлөг.

Дээрээс нь, төр дөрвөн жил суралцаж, мэргэжил эзэмшсэн багш нарыг дэмжихийн оронд 45 хоногийн түр сургалтаар “багш бэлтгэж” байгаа нь хууль зөрчиж байгаа хэрэг.

Мөн сургууль, цэцэрлэгийн хөрөнгө оруулалт газар зүйн хэрэгцээнд нийцэхгүй байна. Зарим газар хүүхэдгүй байхад шинэ сургууль барьдаг, харин нэг сургуульд 6000 хүүхэд шахцалдаж байна.

Сургууль бүрд сурах бичгийн сугалаа гэх ойлголт гарч ирсэн. Нэг ангид 50 хүүхэд байхад 6 багц л сурах бичиг тарааж байгаа нь шударга биш.

Улс орныг мөхөөе гэвэл боловсролыг мөхөө гэдэг. Өнөөдөр боловсролын салбарт гал унтраах маягийн, түр зуурын шийдвэрүүд гарч байна. Энэ байдлаар цааш явах боломжгүй.

Тийм учраас Монголын боловсрол, шинжлэх ухааны үйлдвэрчний эвлэлийн холбоо энэ тэмцлээ үр дүн хүртэл нь үргэлжлүүлнэ. Энэ бол зөвхөн багш нарын биш, Монголын ирээдүйн төлөөх тэмцэл" гэв.