МАН-ын хагарал гүнзгийрч бүлгийн 38 гишүүн Ж.Бат-Эрдэнийг огцрохыг шаардав
Н.Наранбаатарын: Бүлэг сүүлийн хоёр долоо хоног хуралдсангүй. Улс орны өмнө тулгамдсан олон асуудал хуримтлагдлаа.
Ж.Бат-Эрдэнэ: Шулуухан хэлэхэд Д.Амарбаясгалан, нөгөө талд Г.Занданшатар гэдэг хүмүүсийн "виз"-гүйгээр бүлэг дээр нэгдсэн ойлголтод хүрч чадахгүй. Хоосон хэрүүл болно
МАН-ын дотоод зөрчилдөөнтэй холбоотойгоор тус намын бүлэг хоёр долоо хоног хуралдаагүй. Уг нь УИХ дахь намын бүлгүүд 7 хоног бүрийн даваа гарагт хуралдах хуваарьтай байдаг. Тиймээс МАН-ын бүлгийн 38 гишүүн өнөөдөр /2025.10.14/ Ж.Бат-Эрдэнэд шаардлага хүргүүлж, бүлгээ хуралдуулах эс бөгөөс огцрохыг шаардлаа.
УИХ-ын гишүүн Н.Наранбаатар “Бүлгийн хурлыг намын дарга, бүлгийн гишүүдийн олонхи шаардсан бол хуралдуулах боломжтой. Бүлгийн гишүүдийн олонхи буюу 38 гишүүн шаардлага тавилаа. Бүлэг сүүлийн хоёр долоо хоног хуралдсангүй. Улс орны өмнө тулгамдсан олон асуудал хуримтлагдлаа. Бүлэг хуралдаж улс төрийн шийдвэрээ гаргах зайлшгүй шаардлага үүссэн. Аравдугаар арын 9-нд бид цөөхүүлээ бүлгийн даргад бүлгийн хурлыг зарлах шаардлага тавьсан. Мөн гишүүд бүлгийнхээ групп дээр бүлгээ хуралдуулж, улс орны өминө тулгамдсан асуудлаа хэлэлцье гэтэл хурал зарлаагүй, хүлээлгээд байгаа. Цаг хугацаа бага байна, баруун аймгууд гантай байсан. Зуд болох эрсдэл өндөр байна. Төсөв хэлэлцэх шаардлага байна. Засгийн газрыг огцруулах шаардлага, УИХ-ын даргыг огцруулах шаардлага өргөн барьсан байгаа тул хэлэлцэх асуудал их байна. Төрийн ажил тасралтгүй явж байх ёстой тул байнгын хорооны хурлыг өнөөдөр 16:00 цагт дуусангуут үргэлжлүүлээд бүлгийг хуралдах боломжтой” гэв.
Хариуд нь МАН-ын бүлгийн дарга Ж.Бат-Эрдэнэ хэвлэлд тайлбар өгөхдөө "Хоёр тал учраа олоогүй байна. Шулуухан хэлэхэд Д.Амарбаясгалан, нөгөө талд Г.Занданшатар гэдэг хүмүүсийн "виз"-гүйгээр бүлэг дээр нэгдсэн ойлголтод хүрч чадахгүй. Хоосон хэрүүл болно. Тийм учраас Удирдах зөвлөл хуралдаж, энэ асуудлаар чиг гаргаж өгөх ёстой гэдэг байр суурьтай байгаа. Ер нь бол хоёр тал зөвшилцөөд, бичгээ татчихвал асуудал цэгцрэх хувилбар ч бий. Маргаашийн лхагва гарагт 12.00 цагаас бүлгийн хурал зарласан" гэж мэдэгдлээ.
МАН-ын бүлэг маргааш 12:00 цагаас хуралдахаар болжээ.
