МАН-ын зөрчил хонь бүрэн чоно цатгалан намжих уу?

Хоёр хүн маргалдаж байгаа бол хэн ухаантайгийнх нь буруу бөгөөд хэн ухаантай нь буулт хийдэг гэх утга бүхий онч мэргэн үгс санаанд орж байх чинь ээ. Д.Амарбаясгалан УИХ-ын даргын суудлаас өөрийн хүсэлтээр буусан анхны хүн болж нүүр дүүрэн инээмсэглэн айх ичих зүйлгүй шалгуулна гэдгээ мэдэгдлээ. Үүнээс өмнө улстөрчид яагаад түүн шиг зоримог байгаагүй юм бол. УИХ-ын гишүүний халдашгүй дархан эрхээр түрий барьж мөн ч олон хүн ял шийтгэлээс зугтсан даа. Гарын алгыг хазаж болохгүй гэдэг шиг тэд малилзтал инээн ажлаа хийсээр бид ч загасны ой санамжтайгаар олон гэмтнийг одоо санахгүй мартжээ. Г.Занданшатарыг хамтдаа огцрохыг уриалсан ч гэсэн мэдээж тэр огцрохыг хүсэхгүй байгаа. УИХ-д 4 удаа сонгогдсон, УИХ-ын дарга ч байсан, төрийн өндөр албан тушаал юу байна бүгдийг хашсан Г.Занданшатарын хувьд одоогийн албан тушаал нь сүүлийн карьер нь.

Тойрогтоо сонгогдож гишүүн болж чадаагүй түүний хувьд азтай ч гэмээр тохиол бүрдэж адилхан 70-аад оны төлөөлөл У.Хүрэлсүх нь Ерөнхийлөгч байгаа учраас баруун гар нь байж төр түшилцэж байгаа. МАН одоо түүнийг Ерөнхийлөгчийн сонгуульд сойх эсэх дээр толгойгоо гашилгах цаг. Гадаа цас орж хүйтэрч байхад хөгшин настай хүнээ лааз өшиглүүлэн гудамжинд гаргаад яахав дээ гэж бодсон ч байх. Их тэнгэрийн амнаас нүүнэ л гэсэн үг шүү дээ, Ерөнхий сайдаа боливол. Ингээд Г.Занданшатартайгаа МАН үлдэж түүн дээр бооцоо тавьж хөрөнгө оруулсан нөхдүүд үүцээ задлах өвөл болох нь уу даа.

Д.Амарбаясгалан сайн ч үзлээ. 80-аад оны залуус одоо ухарсан ч дахин урагшлах цаг ирнэ. Нас байна, бяр байна, хүч байна, нөхөд байна. Ирж яваа цагийн дууг харьж яваа үеийнхэн дахин дуулах боломж олдлоо. Энэ их хувь заяагаа хайрлаж яваарай, МАН-ын 70-аад оныхоон.