Г.Занданшатар гурав ялагдлаа
Ялагдаж “дуусдаггүй” хүн гэж байдаг юм байна. Ерөнхий сайдын үүрэг гүйцэтгэгч Г.Занданшатар 2024 оноос хойш 3 дахь удаагаа ялагдлаа. 2024 оны УИХ-ын сонгуульд өвдөг шороодож эхний ялагдлаа авсан ч ЕТГ-ын даргаар томилогдож, улмаар бүр Ерөнхий сайд болтлоо дэвшсэн. Уг нь ард түмнээсээ “үгүй” гэдэг хариулт авчихсан. Гэсэн ч тэрээр Ерөнхий сайд хэмээх гүйцэтгэх эрх мэдлийн орой дээр сууж чадсан юм. Ард нь хэн байсан нь нууц биш.
Үүний дараа тэрээр намаа авах гэж оролдсон ч МАН-ынхан түүнд бас л “үгүй” гэж хэлсэн. Ингээд тэрээр 2 дахь ялагдлаа намаасаа авлаа. Гэвч тэр ардын намынхандаа хорсож, уурласан уураа парламентын засаглал руугаа чулуудаж эхэлсэн. Ингээд намын зодоон нь төрийн зодоон болон хувирч, Д.Амарбаясгалангаа “нүдэж” эхлэв.
Харамсалтай нь Д.Амарбаясгалан зогсож, найр тавих улстөрч биш. Түүнд нэр төр, хамгаалах парламент бас нам нь байгаа учраас Г.Занданшатарт УИХ-аар “үгүй” гэж хэлүүллээ. Ингээд Г.Занданшатар нэгхэн жилийн хугацаанд 3 дахиа ялагдах нь тэр. Харин одоо тэр Цэц рүү “гүйлээ”. Угаас тахимаа өгч чаддаггүй, өгсөн ч ямар нэг албан тушаалд очихгүй бол санаа нь амарч, шөнө нойр нь хүрдэггүй Ерөнхий сайдын үүрэг гүйцэтгэгч маань парламентаа үгүйсгэж, Үндсэн хуулийн цэц рүү шургаж, дахиад л Ерөнхийлөгчөөс тусламж хүссэн нь энэ. Шийдвэр нь ямар ч гарсан бай эцэст нь парламентын нэр хүнд унаж байна. Парламентын гишүүд нь гүйцэтгэх засаглалынхантайгаа нийлж УИХ-аа муухай харагдуулсан нь үнэн. Цэцийн шийдвэрээс үл шалтгаалан 3 удаа ялагдсан Г.Занданшатар намдаа ч тэр, УИХ-даа ч тэр легитм байдлаа алдаж буй нь тэр.
Эцэст нь тэр Ерөнхий сайдаар үлдлээ ч огцруулах бичиг дахин өргөн барина гэдгээ П.Сайнзориг гишүүн өчигдөр ил цагаан мэдэгдсэн. Үүнээс харахад л Засгийн газар өнөө маргаашаа торгоож 2027 оны сонгуулиа хүлээх үү, эсвэл дараачийн үедээ шилжүүлэх үү гэдэг нь цаг хугацааны л асуудал болжээ.
М.Саян
