У.Хүрэлсүх, Г.Занданшатар нарын ҮХЦ-д зүтгүүлсэн зургаан гишүүний хэн нь хэн бэ

Ерөнхий сайд Г.Занданшатарыг огцруулах асуудалд Үндсэн хууль зөрчил үүссэн гэж МАН-ын нэр бүхий гишүүд Үндсэн хуулийн цэцэд гомдол гаргаад буй. Тиймээс маргааш Үндсэн хуулийн цэцийн их суудлын хуралдаан 09 цагт эхлэхээр товлогдсон юм.

Тэгвэл уншигч танд  Үндсэн хуулийн цэцэд хэдэн гишүүд хэрхэн томилогдсон талаарх мэдээллийг хүргэе.

Үндсэн хуулийн цэц есөн гишүүнээс бүрддэг бөгөөд гурвыг нь УИХ, гурвыг нь Монгол Улсын Ерөнхийлөгч, үлдсэн гурвыг нь Улсын дээд шүүхийн санал болгосноор УИХ зургаан жилийн хугацаатай томилдог.

Энэ зохицуулалтын дагуу Ерөнхий сайд Г.Занданшатар УИХ-ын даргаар ажиллаж байх үедээ Л.Өлзийсайхан,  Ц.Цолмон, Баясгалан нарыг нэр дэвшүүлж УИХ баталсан.

Тодруулбал, 2019 оны хоёрдугаар сарын 1-нд Гомбожавын Занданшатар УИХ-ын даргаар томилогдож үүнээс дөрвөн сарын дараа Үндсэн хуулийн цэцийн гишүүнээр Г.Баясгаланг нэр дэвшүүлж УИХ-аар томилсон байдаг. Харин 2024 онд Г.Баясгалан ҮХЦ-ын даргаар томилогдсон. Товчхондоо, эдгээр гурван гишүүн бол Ерөнхий сайд Г.Занданшатарын “хүмүүс” юм.

Харин Монгол Улсын Ерөнхийлөгч У.Хүрэлсүх  Р.Батрагчаа, Б.Болдбаатар Э.Энхтуяа нарыг Үндсэн хуулийн цэцийн гишүүнээр томилуулахаар танилцуулж, гишүүдийн олонх дэмжсэн юм.

Өөрөөр хэлбэл, 2023 оны 11 сард Э.Энхтуяаг Үндсэн хуулийн Цэцийн гишүүнд нэр дувшүүлж буйг ЕТГ-ын дарга Я.Содбаатар УИХ-д танилцуулсан байдаг. Түүний хувьд 24 жил хуульч мэргэжлээр ажилласан.  Тэрбээр 1999-2000 онд Ховд аймгийн прокурорын газрын нарийн бичиг, 2000-2001 онд ХЗДХЯ-ны Төрийн захиргаа, удирдлагын газарт бичиг хэргийн эрхлэгч, 2001-2002 онд ХЗДХ-ийн дэд сайдын туслах, 2002-2012 онд ХЗДХЯ-ны Хууль зүйн бодлогын газрын мэргэжилтэн, ахлах мэргэжилтэн, 2012-2016 онд ХЗЯ-ны Эрх зүйн шинэчлэлийн бодлогын газрын ахлах мэргэжилтэн, 2016 оноос ХЗДХЯ-ны Бодлого хэрэгжилтийг зохицуулах газрын даргаар тус тус ажиллаж байжээ.

Тэгвэл Улсын дээд шүүхээс Ж.Эрдэнэбулган, Д.Гангабаатар, О.Мөнхсайхан нарыг гишүүд ажиллаж буй. Ж.Эрдэнэбулган, Д.Гангабаатар нарыг 2021 онд Цэцийн гишүүнээр томилж байсан бол О.Мөнхсайханыг 2023 онд томилсон.

О.Мөнхсайхан нь МУИС-ийн Хууль зүйн сургууль болон хуульч, шүүгчийн үргэлжилсэн сургалтад Үндсэн хуулийн эрх зүй, хүний эрх, шүүх, хуульчийн ёс зүй, эрх зүйн болон улс төрийн философийн хичээлийг заадаг байна. Сүүлийн 10 жилд мэргэшсэн чиглэлээрээ 30 орчим судалгааны төслийг дангаараа болон багаар хэрэгжүүлж, 9 ном, сурах бичиг, 60 гаруй эрдэм шинжилгээний өгүүллийг англи, монгол хэлээр хэвлүүлсэн аж.

 

Маргааш эдгээр есөн гишүүн УИХ-ын дэд дарга Х.Булгантуяа үндсэн хууль зөрчсөн эсэхийг дэнсэлнэ.