Цэцийн хуралдааныг 7 хоногийн өмнө төрийн төв хэвлэлд нийтэлж зарлахаар хуульд заасан хугацааг ҮХЦ баримтлаагүй байна

Үндсэн хуулийн цэцэд маргаан хянан шийдвэрлэх ажиллагааны тухай хууль /23 дугаар зүйлд маргааныг Цэцийн хуралдаанд хэлэлцүүлэхээр бэлтгэх 11 процесс ажиллагааг заасан.

Үүний 3-т “Онц болон дайны байдал зарласан, түүнчлэн цэрэг хөдөлгөх шийдвэртэй холбогдсон маргааныг хянан шийдвэрлэх бэлтгэл ажиллагааг 3 хоногийн дотор гүйцэтгэнэ.” гэж , 4-т “Онц хүндрэлтэй, яаралтай шийдвэрлэх асуудлыг хянан хэлэлцэх хуралдааны бэлтгэлийг хангахын тулд Цэцийн даргын тогтоолоор хоёр буюу хэд хэдэн гишүүнийг томилон ажиллуулж болно.” гэж тус тус заасан. Мөн зүйлийн 5-д “Байгууллага, албан тушаалтан, иргэн Цэцийн гишүүний шаардсан бичиг баримтыг хугацаанд нь гаргаж өгөх үүрэгтэй.” гэж заажээ.

Гэтэл Цэц дээрх хуульд заасан бэлтгэл ажиллагааг бүрэн хийлгүйгээр, хуульд заасан 3 хоногийн дотор хийх бэлтгэл ажиллагаанд хамаарахгүй маргааныг хуралдаанаараа хэлэлцэхээр хуралдаанд бэлтгэх процесс зөрчиж байгаа нь хууль дээдлэх зарчмыг алдагдуудсан гэж үзэх үндэслэлтэй байгаа юм. Түүнчлэн Үндсэн хуулийн цэцэд маргаан хянан шийдвэрлэх ажиллагааны тухай хуулийн 24 дүгээр зүйлийн 3 дахь хэсэгт “Цэцийн гишүүн нь хуралдааныг нээлттэй буюу хаалттай хийх, мөн Цэцийн даргатай зөвшилцөн хуралдаан болох газар, өдөр, цагийг товлож энэ хуулийн 23 дугаар зүйлийн З дахь хэсэгт зааснаас бусад тохиолдолд 7 хоногийн өмнө төрийн төв хэвлэлд нийтэлж зарлана.” гэж заасан.

Тодруулбал, дээрх хуулийн 23 дугаар зүйлийн 3 дахь хэсэгт заасан онцгой тохиолдлоос бусад тохиолдолд Цэцийн хуралдааныг 7 хоногийн өмнө төрийн төв хэвлэлд нийтэлж зарлахаар хуульд заасан хугацааг баримтлаагүй нь мөн хуулийн 24 дүгээр зүйлийн 3 дахь хэсэгт заасан хугацааг зөрчсөн гэж харагдахаар байна.