Б.Баасандорж: Байнгын хороо Ерөнхий сайдыг огцруулахыг дэмжихгүй гэдэг шийдвэр гаргасан нь саналын томьёолол болоод чуулганд орсон, хуулийн зөрчил байхгүй
УИХ-ын Тамгын газрын ерөнхий нарийн бичгийн дарга Б.Баасандорж Ерөнхий сайд Г.Занданшатарыг огцруулсан бүх процесс Монгол Улсад хүчин төгөлдөр мөрдөж буй хуулийн хүрээнд өрнөсөн гэдгийг Цэцийн Их суудлын хуралдаанд танилцуулжээ. Түүний хувьд өнөөдрийн Цэцийн хуралдаанд гэрчийн хувиар оролцсон бөгөөд асуултад хариулахдаа өмнөх жишиг, жишээ дурдах бус өнөөдөр хүчин төгөлдөр байгаа хуулийн тодорхой заалтуудын дагуу Байнгын хороо хуралдаж, дүгнэлтээ гаргасан.
Үүний дагуу УИХ-ын чуулганы нэгдсэн хуралдаан өрнөсөн болохыг танилцуулсан байна. Тэрбээр “Үндсэн хуулийн Цэцийн их суудлын хуралдаанд миний бие гэрчийн хувиар оролцлоо. Хуралдааны үеэр Цэцийн болон Засгийн газрын итгэмжлэгдсэн төлөөлөгчдийн асуултад хариуллаа. Гэрчийн эрх үүрэг бол асуултад л хариулна, уг үүргээрээ хуралд оролцлоо. Өнөөдөр үндсэн гурван асуудлыг хэлэлцлээ.
Нэгдүгээрт, УИХ-ын дэд дарга чуулганы нэгдсэн хуралдааныг даргалсантай холбоотой асуудал. Хоёрдугаарт, УИХ-ын үйл ажиллагаатай холбоотой, гуравдугаарт, Ерөнхий сайдыг огцруулсан УИХ-ын 95 дугаар тогтоолыг хэлэлцлээ. УИХ-ын Тамгын газрын Ерөнхий нарийн бичгийн даргын хувьд тухайн өдрийн чуулганы нэгдсэн хуралдааны дэлгэрэнгүй тэмдэглэл, байнгын хорооны хуралдааны дэлгэрэнгүй тэмдэглэлийг ирүүлсэн. Чуулганы хуралдаанд 111 гишүүн оролцож, 71 гишүүн байнгын хорооны саналыг дэмжихгүй гэсэн шийдвэр гаргасан.
Монгол Улсад хүчин төгөлдөр үйлчилж байгаа 800 гаруй хууль Үндсэн хуулийн үзэл баримтлалд нийцэх ёстой. Энэ хүрээнд УИХ-ын дэгийн тухай хуулийн дагуу Төрийн байгуулалтын байнгын хороны санал дүгнэлт гараад тус байнгын хорооны 32 гишүүнээс 22 гишүүний санал дүгнэлт гараад, энэ 22 гишүүний 13.6 хувь нь Ерөнхий сайдыг огцруулах саналыг дэмжихгүй гэж гарсан. Энэ нь өөрөө саналын томьёолол болоод чуулганд орж ирсэн. ТББХ-ны саналаар санал хураадаг.
Дэгийн хуульд чуулганы хуралдаанаар орох бүх асуудлыг холбогдох байнгын хороогоор хэлэлцэж, санал дүгнэлт гаргана. Санал дүгнэлтийг нэгдсэн хуралдаанаар хэлэлцэж шийдвэрлэнэ гэж байгаа” гэдгийг тодотголоо.
