Г.Занданшатарт ээлтэй “ТӨР”

Ерөнхий сайд Г.Занданшатар аврагдаж, Д.Амарбаясгалан “унав”

Өнгөрсөн Баасан гарагийн /2025.10.17/ УИХ-ын чуулганы хуралдаанаар Ерөнхий сайд Г.Занданшатар, УИХ-ын дэд дарга Д.Амарбаясгалан нар хамтдаа огцорч Монгол Улсын байтугай дэлхийн түүхэнд тохиож байгаагүй үйл явдал болсон. Төрийн гурван өндөрлөгийн хоёр нь нэгэн зэрэг огцорч улс орон эзгүйрэх шахсан ийм кэйс дэлхийн улс төрийн түүхэнд ч байхгүй жишиг гэдгийг судлаачид онцолж буй. Энэхүү үйл явцын дараа Г.Занданшатар өөрийгөө өмгөөлж, Үндсэн хуулийн цэцэд хандаад зогсохгүй, Ерөнхийлөгч У.Хүрэлсүх Ерөнхий сайд Г.Занданшатарыг огцруулах шийдвэрт бүхэлд нь хориг тавьсан билээ.

Улмаар өчигдөр Үндсэн хуулийн Цэцийн Их суудлын хуралдаан болж 22.30 цагт  Үндсэн хуулийн цэцийн Их суудлын хуралдааны шийдвэрийг ҮХЦ-ийн Их суудлын хуралдааны гишүүн О.Мөнхсайхан танилцуулсан. Тэрбээр хэлэхдээ "УИХ-ын дэд дарга Х.Булгантуяагийн удирдсан Ерөнхий сайдыг огцруулах эсэхийг хэлэлцсэн 10 дугаар сарын 17-ны өдрийн УИХ-ын чуулганы хуралдаан Үндсэн хуулийн холбогдох зүйл заалтыг зөрчсөн эсэхийг ҮХЦ-ийн Их суудлын хуралдаанаар хянан хэлэлцэв. Ерөнхий сайдыг огцруулах тухай УИХ-ын тогтоол нь Монгол Улсын Үндсэн хуулийн 1.2, 43.1, 70.1 дэх хэсгийг зөрчсөн гэж үзлээ” гэснээр маргаан одоохондоо эцэслэгдээд байна.

Товчхондоо Ерөнхий сайд Г.Занданшатар Цэцийн шийдвэрээр суудалдаа үлдэж, УИХ-ын дарга асан Д.Амарбаясгалан ганцаараа огцорсоноор өнөөдөртөө төрийн хямралд хүргэсэн МАН-ын дотоод зөрчил нэг талдаа багтаж байгаа юм.

Эндээс олон нийтийн ойлгож үлдсэн хоёр өнцөг:

1. Хуулийг хүсвэл яаж ч тайлбарлаж болохуйц олон өнцөгтэй юм байна.
2. Өнөөгийн төр Г.Занданшатарт илүү ээлтэй төр юм байна. Тэр үнэхээр азтай аавын хүү юм байна. 

Одоо нэн түрүүнд шийдэх асуудал бол дараагийн спикер хэн байх, хэзээ томилох вэ гэдэг асуулт. Магадгүй Л.Энх-Амгалан гишүүн дараагийн спикерээр тодрох хамгийн магадлал өндөртэй кандидат. Шийдлийг МАН-ын Удирдах зөвлөл гаргана.

М.Үүрийнтуяа