“China Mining 2025” арга хэмжээний үзэсгэлэнд Монгол Улс анх удаа оролцож байна

БНХАУ-ын Тяньжин хотод зохион байгуулагдаж буй “China Mining 2025” арга хэмжээний эхний өдөр “Mining in Mongolia” өдөрлөгийг Монгол Улсаас БНХАУ-д суугаа Элчин сайдын яам, Аж үйлдвэр, эрдэс баялгийн яам болон Монголын Уул Уурхайн Үндэсний Ассоциаци (МУУҮА) хамтран амжилттай зохион байгууллаа.

Энэхүү өдөрлөгийн зорилго нь Монголын уул уурхайн салбарын өнөөгийн байдал, хөрөнгө оруулалтын орчин, ирээдүйн чиг хандлагыг олон улсын хөрөнгө оруулагчдад танилцуулах явдал байв.

“China Mining 2025” үзэсгэлэн өмнөх жилүүдийнхээс илүү өргөн хүрээтэй, нарийвчилсан бүтэцтэй зохион байгуулагдаж буйгаараа онцлог бөгөөд ухаалаг олборлолт, геологийн судалгаа, хайгуулын тоног төхөөрөмжийн зориулалтын бүсүүд нээгджээ. Үзэсгэлэн голчлон дижитал уурхай болон ногоон технологийн инновацад чиглэж байна.

Мөн энэ үеэр ашигт малтмалын эрхийн хоёрдогч зах зээлийн худалдааны туршилтын платформ нээгдэж, уул уурхайн төслийн ил тод жагсаалт, шинэлэг дуудлага худалдааны загваруудыг санал болгох аж. “Интернэт+Уул уурхай”-г уялдуулсан энэхүү систем нь нөөцийн хуваарилалтыг оновчтой болгож, хоёрдогч зах зээлийг идэвхжүүлэх зорилготой.

Арга хэмжээнд Монгол Улсын Их Хурлын гишүүн Ж.Золжаргал, Ч. Лодойсамбуу, С.Цэнгүүн, Монгол Улсаас БНХАУ-д суугаа Онц бөгөөд Бүрэн эрхт Элчин сайд Н.Энхболд, БНХАУ-ын Байгалийн нөөцийн яамны Геологийн хайгуул, уул уурхайн хяналтын газрын орлогч дарга Ниу Ли, АҮЭБЯ-ны Бодлого төлөвлөлт, судалгааны хэлтсийн дарга М.Мэндбаяр, Эрдэнэт үйлдвэр ТӨҮГ-ын Ерөнхий захирал Г.Ёндон, МУУҮА-ийн Гүйцэтгэх захирал Г.Эрдэнэтуяа болон АМГТГ, “Эрдэнэс Монгол” нэгдэл, Эрдэнэс Тавантолгой ХК, Монголын Хөрөнгийн Бирж, “Оюут улаан” ХХК-ийн төлөөлөл зэрэг төр, хувийн хэвшлийн удирдлага, хөрөнгө оруулагчид, салбарын мэргэжилтнүүд гээд 150 гаруй оролцогч оролцож байна.