ТЕГ-аас "Оюутолгойн" албан тушаалтнуудад гүйцэтгэх ажиллагаа явуулж баривчилжээ
Оюутолгой компанийн худалдан авар газрын нэр бүхий 4 ажилтны гэрээс маш их хэмжээний бэлэн мөнгө илэрчээ.
Тодруулбал, ТЕГ-аас 2025 оны 10 дугаар сарын 22-ны өдрөөс 23-нд шилжих шөнө “Оюутолгой “компанийн Худалдан авах газрын нэр бүхий албан тушаалтнуудад хойшлуулшгүй ажиллагааны хүрээнд гүйцэтгэх ажиллагаа явуулж, орон байр болон тээврийн хэрэгсэлд нь үзлэг нэгжлэг хийсэн байна. Тодруулбал, тус компанийн Д.А, Б.С, М.Г, Ч.Н гэх нэр бүхий 4 хүнийг баривчласан бололтой.
Эх сурвалжийн мэдээллээр үзлэг, нэгжлэгийн үеэр тэдгээр иргэдийн орон байр, тээврийн хэрэгслээс их хэмжээний мөнгө, үл хөдлөх хөрөнгө болон автомашин эзэмшиж буй байдал тогтоогджээ.
Сэжигтнүүдийг албан тушаалын байдлаа урвуулан ашиглаж бусдад давуу байдал олгосон, өндөр үнэтэй үл хөдлөх хөрөнгө худалдан авах замаар мөнгө угаасан байж болзошгүй гэдэг үндэслэлээр баривчлан саатуулж, шалгах юм байна.
Энэ асуудалтай холбоотойгоор “Оюу толгой” компаниас мэдэгдэл гаргажээ.
Тэрбээр мэдэгдэлдээ, “Оюу толгой” компани нь авилга, хээл хахууль, аливаа ёс зүйн зөрчлийг үл тэвчих хатуу дүрэмтэй. Компанийн худалдан авах үйл ажиллагаатай холбоотой зөрчил гарсан тухай мэдээлэлтэй холбогдуулан хяналт, шалгалт явуулж байгаа бөгөөд хууль сахиулах байгууллагуудтай хамтран ажиллаж байна. Шалгах ажиллагаа явагдаж байгаа учир илүү дэлгэрэнгүй мэдээлэх боломжгүй байна.
“Оюу толгой” компани нь худалдан авалтын үйл ажиллагаатай холбоотой үндэслэлтэй, баримт нотолгоотой аливаа санал гомдлыг myvoicemongolia@riotinto.com хаягаар хувь хүний мэдээллийн нууцлалыг чанд хадгалан хүлээн авдаг.
Энэ нь одоогийн болон хуучин ажилтнууд, гэрээт ажилтнууд, ханган нийлүүлэгчид, үйлчилгээ үзүүлэгчид, түншлэгч байгууллагууд, бидний үйл ажиллагаа явуулж буй орон нутгийн иргэд гэхчлэн хэн бүхэнд нээлттэй. Аливаа санал гомдлыг чухалчлан авч үзэж, холбогдох хяналт шалгалтыг хөндлөнгийн бие даасан байгууллага явуулдаг.
Илэрсэн зөрчилд дотоод журам болон холбогдох хуулийн дагуу арга хэмжээ авдаг болно” гэжээ.
