Таамаглал: УИХ-ын даргын марафонд хүч үзэгсэд

УИХ-ын дараагийн дарга хэн бэ?

Намрын буцалж улайссан улс төр одоо нэг намжих чимээ дөхөх шиг. Ерөнхий сайд Г.Занданшатарыг огцруулсан УИХ-ын чуулганы хуралдаан Үндсэн хууль зөрчсөн хэмээн ҮХЦ алх цохисноор асуудал жаахан намжив.

Харин одоо дараагийн УИХ-ын дарга, спикер хэн байх вэ? гэсэн асуулт төрийн ордонд тэнүүчилж явна. Эх сурвалжийн мэдээллээр, УИХ-ын даргын марафонд хэд хэдэн гишүүдийн нэрс яригдаж байгаа аж.

Тухайлбал, ЗГХЭГ-ын дарга С.Бямбацогт, ХХААХҮ-ийн сайд Ж.Энхбаяр, УИХ-ын гишүүн Л.Энх-Амгалан нарын нэрс яригдаж байгаа юм байна.

Тодруулбал, УИХ-ын дараагийн дарга болох хамгийн өндөр магадлалтай хүний нэгдүгээрт УИХ-ын гишүүн Л.Энх-Амгалан. Түүний хувьд 2012 оноос хойш дөрөв дэх удаагаа УИХ-д сонгогдсон. УИХ-ын гишүүнээр ажиллахдаа 2016-2017 онд НББСШУ-ы байнгын хорооны дарга, 2017-2020 онд УИХ-ын дэд дарга, 2020-2021 онд ТББХ-ны дарга, 2021-2024 онд Засгийн газарт БШУ-ы сайд, 2024-2025 онд Засгийн газарт ГБХНХ-ын сайдаар ажилласан.

Мөн дараагийн хувилбар нь ЗГХЭГ-ын даргын үүрэг гүйцэтгэгчээр ажиллаж буй С.Бямбацогт. Тэрээр, УИХ-ын 2008 оны сонгуулиас хойш тасралтгүй сонгогдож, тав дахь удаагаа УИХ-ын гишүүнээр ажиллаж байгаа юм. С.Бямбацогт УИХ-ын гишүүнээр ажиллах хугацаандаа 2013-2016 онд УИХ дахь МАН-ын бүлгийн дарга, 2016-2017 онд Засгийн газарт ХЗДХ-ийн сайд, 2018-2019 онд УИХ-ын Ёс зүйн дэд хорооны дарга, 2019-2020 онд ТББХ-ны дарга, 2020-2022 онд Хууль зүйн байнгын хорооны дарга, 2022-2024 онд Засгийн газарт ЗТХ-ийн сайд, 2024-2025 онд Засгийн газарт Батлан хамгаалахын сайд, 2025 оны зургадугаар сараас ЗГХЭГ-ын даргаар ажилласан.

Харин дараагийн нэр нь яригдаж буй эрхэм бол ХХААХҮ-ийн сайд Ж.Энхбаяр. Тэрээр Улаанбаатар хотын гааль, Гаалийн ерөнхий газар, Мэргэжлийн хяналтын ерөнхий газар зэрэгт ажиллаж байгаад 2008, 2012, 2016 онуудад УИХ-ын гишүүнээр сонгогдон ажиллаж байсан. Мөн Батлан хамгаалахын сайдын албыг хашиж байсан төрд удсан хүн. Мөн Үндэсний аюулгүй байдлын зөвлөлийн Нарийн бичгийн даргын алба хашиж байв. Улмаар 2024 оны УИХ-ын оснгуульд нэр дэвшихээр албан тушаалаасаа чөлөөлөгдөж, Ерөнхийлөгч У.Хүрэлсүхийн Үндэсний аюулгүй байдал, улс төрийн зөвлөхөөр ажиллаж байгаад төвийн бүсээс сонгогдон дахин УИХ-ын гишүүн болсон. Одоо Г.Занданшатарын кабинетад багтаж ХХААХҮ-ийн сайдаар ажиллаж байна.