Санасандаа хүрсэн Б.Энхбаяр оройхон гарч ширүүхэн дайрав
Өчигдөр /2025.10.24/ УИХ-ын намрын ээлжит чуулганы үдээс хойших хуралдаанд Ерөнхий сайд Г.Занданшатар ХЗДХ-ийн сайд Б.Энхбаярыг танилцуулж, сайдын бүрэн эрхийг баталгаажуулсны дараа орой 19 цагийн орчимд Засгийн газраа ээлжит бусаар хуралдуулав.
Улмаар Хууль зүйн сайд Б.Энхбаяр хэд хэдэн төрийн алба хаагчдын ажлаас нь чөлөөлж буйгаа мэдэгдлээ.
Тодруулбал, ЦЕГ-ын дарга Т.Сүхболдыг чөлөөлж, бригадын генерал Ц.Ням-Очирыг тус газрын даргын үүргийг түр орлон гүйцэтгэгчээр томилсон байна. Т.Сүхболдын тухайд Дотоодын цэргийн командлагч, Бригадын генерал цолтой. 2023 онд Эрүүгийн цагдаагийн албаны даргаар ажиллаж байгаад ЦЕГ-ын даргаар дэвшсэн.
Хэнтий аймгийн цагдаагийн газрын Эдийн засгийн гэмт хэрэгтэй тэмцэх хэлтсийн төлөөлөгчөөр ажиллаж байсан тэрбээр 2020 оноос хойш Цагдаагийн ерөнхий газрын Эрүүгийн цагдаагийн албанд даргаар ажиллаж байв. Улс төрийн хүрээлэлд түүнийг Ерөнхий сайд Л.Оюун-Эрдэнийн хүн гэгддэг.
Харин Ц.Ням-Очирын тухайд 2020 онд тус газрын тэргүүн дэд даргаар томилогдож байсан бөгөөд анх ажлын гараагаа Авто засварын үйлдвэрийн нэгдлийн гэрээт галын хэсэгт гал сөнөөгчөөр эхэлж байсан. Нэг үгээр, Гал сөнөөгчөөс Бригадын генерал болтлоо дэвшсэн гэсэн үг. Цаашлаад 2002 онд Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн ахлах төлөөлөгч, 2002 оны 09 дүгээр сараас Эрүүгийн цагдаагийн газрын 3 дугаар хэлтэст ахлах төлөөлөгчөөр тус тус ажиллаж байжээ.
Халаа сэлгээ үүгээр зогссонгүй, Засгийн газрын ээлжит бус хуралдаанаар мөн Татварын ерөнхий газрын даргыг ажлаас халж, үүрэг гүйцэтгэгчээр С.Төгсжаргалыг томиллоо. Тэрбээр Татварын ерөнхий газрын Том татвар төлөгчийн газрын даргаар ажиллаж байсан аж. Татварын ерөнхий газрын даргаар оролдсоны цаад шалтгаан нь АМНАТ-ын 55 хувийн маргаан дээр Сангийн яамныхан кабинетынхаа эсрэг дуугарсаны гор гэж харж болохоор. Сангийн сайд Б.Жавхланг халалтай биш, тоо баримтыг нь бэлдэж өгсөн татварын газар руу хальтирч, халдсан гэсэн үг.
Энэ янзаараа Тагнуулын ерөнхий газар, АТГ-ын дарга нараар ч оролдох магадлал өндөр байна.
Нэхэн сануулбал, МАН-ын даргын зодооны үеэр/2025.09.30/ Ерөнхий сайд Г.Занданшатар Б.Энхбаярыг Хууль зүйн сайдаар томилох тухайгаа ард түмэнд мэдэгдсэн байдаг.
Тэрхүү мэдэгдэлдээ Нүүрсний хулгайтай тэмцэхийн тулд түүнийг Хууль зүйн сайдаар томилохоор шийдсэнээ онцолж байв. Гэтэл өнгөрсөн хоногуудад МАН-ын хэрүүлийн элсэн шуурга улам ширүүсч Г.Занданшатарын суудал хүртэл дээсэн дөрөөн дээр дэнжигнэж байв. Энэ хугацаанд Б.Энхбаярын Хууль зүйн сайд болох мөрөөдөл ч бараг талаар болж байсан юм.
Гэтэл хэзээний азтай Г.Занданшатарыг энэ удаад Үндсэн хуулийн цэц “ивээж” бүрэн эрх нь сэргэснээр тэдний фракцийн ноёрхол ийн эхэлж байна. Угаас Монголын улс төрд хууль биш хүн засагладаг болсоор удаж буй.
Харин одоо тэдний сүржин эхлэл даржин дуусах уу, эсхүл нүүрсний хулгайчдыг хуйгаар нь хамах уу гэдгийг нухацтай харах л үлдлээ.
М.Үүрийнтуяа
