ЦЕГ-ын дараагийн даргад Ерөнхийлөгч У.Хүрэлсүх болон Ерөнхий сайд Г.Занданшатар нарын хүмүүс яригдаж байна
Хууль зүйн сайд Б.Энхбаяр ажлаа авсан өдрөө шуудхан Цагдаагийн ерөнхий газрын дарга Т.Сүхболдыг чөлөөлснөөр эхлүүлсэн бөгөөд дараагийн даргыг нт ойрын хугацаанд томилохоо мэдэгдээд авсан.
Тэгвэл өнөөдрөөс ЦЕГ-ын дараагийн дарга хэн байх вэ гэдэг буухиа үргэлжлэх нь. Мэдээж Ерөнхий сайд Г.Занданшатар өөрийн гарын хүнээр Цагдаагийн ерөнхий газрыг удирдуулах нь ойлгомжтой. Тэгэх тусмаа “нүүрсний хулгайтай тэмцэнэ” хэмээн том амалж одоогийн ажил дээрээ чүү ай үлдээд буйг хэлэх үү, хууль хүчний байгууллага дээр үгнээс нь гардаггүй утсан хүүхэлдэй байх нь хамгаас чухал.
Цагдаагийн ерөнхий газрын даргын томилгоо Ерөнхий сайдын бүрэн мэдэлд байдаг томилгоо.
Цагдаагийн албаны тухай хуулийн 20.1-т, Цагдаагийн төв байгууллагын даргаар цагдаагийн албанд 20-оос доошгүй жил ажилласан, эрх зүйч мэргэжилтэй, удирдах болон мэргэжлийн ажлын дадлага туршлагатай, улс төрийн албан тушаал эрхэлж байгаагүй Монгол Улсын иргэнийг дотоод хэргийн асуудал эрхэлсэн Засгийн газрын гишүүний санал болгосноор Засгийн газар томилж, чөлөөлнө гэж заасан байдаг.
ЦЕГ-ын дараагийн даргад дараах нэрс хүчтэй яригдаж байгаа талаар эх сурвалжууд мэдээлж байна.
Эхнийх нь ЦЕГ-ын Хэрэг бүртгэх албаны даргаар ажиллаж буй Цагдаагийн хурандаа Б.Оюутболд. Ерөнхий сайд Г.Занданшатартай нутаг нэг гэх давуу тал түүнд бий. Тэрээр Баянхонгор аймгийн Цагдаагийн газрын даргаар ажиллаж байгаад Улаанбаатар хотод ирж Тээврийн цагдаагийн даргаас Нийслэлийн цагдаагийн удирдах газрын Дэд дарга бөгөөд Нийтийн хэв журам хамгаалах газрын дарга хүртэл ажилласан туршлагатай.
Удаах нь ШШГЕГ-ын дарга О.Амарсанаа. Тэрбээр 2023 онд ЦЕГ-ын даргын сунгаанд яригдаж байсан хувилбар. Сонирхолтой нь О.Амарсанаа нь Ерөнхийлөгч У.Хүрэлсүхийн хамаатан бөгөөд түүний дэмжлэгээр ШШГЕГ-ын дарга болсон гэгддэг. Хоёр жилийн өмнө хурандаа цол хүртсэн, ажлын туршлага 2001 оноос Төв аймгийн Цагдаагийн газарт эрүүгийн төлөөлөгчөөр ажлын гараагаа эхэлж, 2021 онд Хууль зүй, дотоод хэргийн сайд Х.Нямбаатарын тушаалаар ЦЕГ-ын дэд даргаар томилогдон ажиллаж байгаад 2022 оны арваннэгдүгээр сард ШШГЕГ-ын даргын албан тушаалыг хаших болсон.
Ямартай ч ЦЕГ-ын дараагийн даргаар ажиллах эрхмүүдийн нэрс хэд ч хувирч болох бөгөөд логикоороо Засгийн газар дангаараа шийдэх үү, Ерөнхийлөгчийн нөлөөлөл орох уу гэдэг томилгоо бүрт ажиглагдах болсон зүй тогтол үйлчлэх нь туйлаас тодорхой юм.
