МАН-ын УЗ-ийн хурлын өмнө үе үеийн Ерөнхий сайдууд ЮУ ХЭЛЭВ?
МАН-ын Удирдах зөвлөл хаалттайгаар хуралдаж байна. Тус хуралдаанаар цаг үе, улс төрийн нөхцөл байдлын талаар санал солилцох аж. Мөн ажил хаялт, шатахууны зохиомол хомсдол, Засгийн газар, парламентын асуудлыг хэлэлцэнэ гэсэн. Үнэндээ ах намын томчууд хоорондоо учраа ололцоосой, сөргөлдөгч талууд улс орноо биш гэхэд намаа бодож эв зүйгээ олоосой гэдэг хүлээлт олон нийтэд бий.
Тэгвэл хуралдааны өмнө МАН-ын Удирдах зөвлөлийн гишүүд болон үе үеийн Ерөнхий сайд нар байр сууриа юу гэж илэрхийлснийг сонирхьё.
Ерөнхий сайд асан С.Баяр: Би хуваагдаад байгаа хоёр талыг эвлэрүүлэхээр хичээл зүтгэл гаргасан. Бүтэж өгөхгүй байна!
"Хөдөө байж байгаад хурлын зар аваад ирлээ. Би улс төрийн урсгалаас хол байгаа хүн. Гэхдээ Бодлогын зөвлөлийн гишүүн учраас хуралдаа ирлээ. Би хуваагдаад байгаа хоёр талыг эвлэрүүлэхээр хичээл зүтгэл гаргасан. Бүтэж өгөхгүй байна. Санаа зовмоор юм болж байна шүү дээ. Нэг намын асуудал цаашаа хальсаар төрийн хямрал боллоо. Сүүлдээ Үндсэн хуулийн цэц ч оролцлоо. Одоо үүссэн асуудлыг улс орны эрх ашиг, аюулгүй байдалд хохиролгүйгээр шийдэх ёстой. Улс төрийн нам гэдэг бол хүмүүсийн нэгдэл. Хүмүүс байгаа газар асуудал байдаг. Миний үед ч санал зөрөлдөх зүйлс гардаг л байсан. Гэхдээ өнөөдрийнх шиг зүйл болж байсныг мэдэхгүй байна" гэв.
Ерөнхий сайд асан Ж.Эрдэнэбат: Их хурлаар намын даргыг шийдэх ёстой
Намайг Ерөнхий сайдаас огцроход Үндсэн хуулийн өөрчлөлт ороогүй байсан. Тэгэхээр манай ЗГ-ыг огцруулах, Г.Занданшатарын ЗГ-ыг огцруулах хоёр өөр нөхцөл байдал. Бага хурлаар МАН-ын даргыг сонгосон шийдвэр гарсан гэж үзэхгүй байгаа. Их хурлаар намын даргыг шийдэх ёстой.
УИХ-ын гишүүн, ЗГХЭГ-ын дарга С.Бямбацогт: Бид удахгүй намын даргаа сонгоно. Тэр хүн Ерөнхий сайд болно. Тэр хүртэл засаг, төрөөр оролдох хэрэггүй
Удирдах зөвлөл үүсээд буй улс төр, нийгэм эдийн засгийн асуудлаар ярилцах болов уу. Үл ойлголцол үзэн ядалт болдог. Үзэн ядалт өш хонзон болдог. Тиймээс өш хонзонгоор асуудлыг битгий шийдээсэй. Эхлээд 30/38-аар хуваагдсан хоёр талыг эвлэрүүлж байж дараагийн асуудал яригдана. Тэр хүртэл УИХ-ын дарга, сайд нарын асуудал яригдахгүй. МАН-ын Их хурлаар намын дарга болсон хүн Ерөнхий сайд болох зарчимтай. Тун удахгүй намын даргаа сонгож, тэр хүн нь Ерөнхий сайд болж Засгийн газраа шийдэх тул түүнээс нааш засаг төрөөр оролдох хэрэггүй.
УИХ дахь МАН-ын бүлгийн дарга Ж.Бат-Эрдэнэ: УИХ өөрийн байгуулсан Засгийн газартай холбоотой асуудлыг хэлэлцэхэд Засгийн газар бойкот хийх нь төрийн эрх мэдлийг булаалцалдаж байгаа Үндсэн хуулийн асуудал зөрчил юм.
Бүлэг нэгдмэл, намын бодлого нэг байх асуудал эхэнд тавигдаж байна. Үүнтэй уялдуулж бүлгээс зургаа, УЗ-өөс гурван хүний бүрэлдэхүүнтэй ажлын хэсэг гаргах санал явж байна. Улс төрийн дүгнэлт гаргах ажлын хэсэг. Цалин, тэтгэвэр эдийн засаг, намын улс төр гээд бүх асуудлаар ажлын хэсгийн чиглэл гаргана. МАН-ын Удирдах зөвлөлийн гаргасан дүгнэлтийг бүгд дагах ёстой. УИХ өөрийн байгуулсан Засгийн газартай холбоотой асуудлыг хэлэлцэхэд Засгийн газар бойкот хийх нь төрийн эрх мэдлийг булаацалдаж байгаа Үндсэн хуулийн зөрчил юм. Засгийн газрыг байгуулах, татан буулгах нь УИХ-ын бүрэн эрх.
Харин Ерөнхийлөгч асан Н.Энхбаяр хурлын өмнө байр сууриа илэрхийлэхээс татгалзлаа.
М.Үүрийнтуяа
