МАН-ын Удирдах зөвлөлийн хоржоонтой шийдвэр

МАН-ын Удирдах зөвлөл дүлэгнэж дүлэгнэж өнөөдөр сүр дуулиантай гэгч нь хуралдав. Энэхүү хуралдаанаар МАН-ын дотоод хурцадмал асуудлыг шийдвэрлэх арга замуудыг эрэлхийлж дорвитой шийдвэр гарах байх гэж олон нийт тэр чигээрээ чих тавин хүлээж байлаа. Учир нь МАН-ын хагарал бутралаас үүдэж төрийн бүх ажил тэг зогсолт хийж, төсвийн хэлэлцүүлэг хүртэл гацаанд ороод буй.

Гэтэл МАН-ын Удирдах зөвлөл зургаан цаг хуралдаж гаргасан шийдвэр нь Ерөнхий сайд Г.Занданшатар, УИХ-ын дарга Б.Амарбаясгалан нарыг эвлэрүүлэх ажлын хэсэг байгуулахад санал нэгдсэн аж. Бас л хоржоонтой шүү.

Ажлын хэсгийн ахлагчаар УИХ-ын гишүүн асан Ч.Хүрэлбаатар ажиллах гэнэ. Мөн тус ажлын хэсэгт С.Баяр, Ц.Нямдорж, Н.Энхбаяр, Н.Учрал тэргүүтэй хүмүүс багтжээ.

Энэ талаар МАН-ын ЕНБД Я.Содбаатар мэдээлэл өгөхдөө, “МАН дотроо талцаад нэлээд хугацаа өнгөрсөн. Хоорондоо ойлголцож, уулзаж ярилцах боломжийг нээх үүднээс ажлын хэсэг байгууллаа. Парламентын гишүүд, УЗ-ийн гишүүд, урьд нь намын даргаар ажиллаж байсан ахмадуудыг оролцуулсан. Өнөө маргаашдаа нэмж мэдээлэл аваад тодорхой шийдэл гаргах нь зүйтэй гэж үзлээ” гэжээ.

Одоо тэгээд буруу ишилсэн сүх шиг зөрүүд Г.Занданшатар нь залуу омголон зантай Б.Амарбаясгалантай хэрхэн эвлэрэх юм болдоо. Харж л байя.

Нэмж сануулахад, Ч.Хүрэлбаатар ахлахтай ажлын хэсэг нөгөө хоёр талыг хоёр хоногийн дотор эвлэрүүлэх үүрэг авсан байна.

М.Үүрийнтуяа