Г.Занданшатар өөрөөс нь өөр үзэл бодолтой хэнийг ч болов “ялтан” болгож чадахаа батлан харууллаа

Монгол Улсын засаглал, төрийн эрх мэдлийн хуваарилалтыг хуулийн бус замаар гартаа оруулах, хуулийн бус аргаар авах оролдлогыг удаа дараа гаргаж эхэллээ. Тэр дундаа гүйцэтгэх засаглалын тэргүүнээр ажиллаж буй хүн ийм ажиллагааг гардан гүйцэтгэж, парламентын засаглал төдийгүй бүрэн эрхэд бүдүүлгээр халдаж буйг Монголын ард түмэн хангалттай харж байна.

Энэ тухайд ганцхан жишээ татахад, Ерөнхий сайд Г.Занданшатар “Үндсэн хуулийн бус аргаар төрийн эрхийг авах гэсэн хууль бус үйл ажиллагаанд оролцсон” гэх үндэслэлээр Шадар сайд С.Амарсайхныг үүрэгт ажлаас нь чөлөөлж буйгаа мэдэгдэв. Гэтэл Улсын их хурал бол төрийн эрх барих дээд байгууллага. УИХ-ыг ард түмэн сонгон баталгаажуулснаар байгуулдаг учраас төрийн бүх эрх мэдэл парламентынх.

Гэтэл Г.Занданшатар ийнхүү мэдэгдсэн нь Засгийн газрыг төрийн эрх барих дээд байгууллага гэж үздэг төдийгүй цаашид бүх эрх мэдлийг гартаа оруулах гэсэн санаархлаа илтгэж орхив. Угтаа УИХ бүрэн эрхийнхээ хүрээнд Засгийн газартаа хариуцлага тооцсон буюу ард түмнээс сонгогдсон УИХ-ын гишүүдийн үнэмлэхүй олонх нь Ерөнхий сайд Г.Занданшатарыг огцруулах санаачилга гаргаж, мөн л үнэмлэхүй олонхоор огцруулсан.

С.Амарсайханы хувьд Г.Занданшатарыг огцруулахад гарын үсэг зурж, кноп дарсан гэдгээрээ ийнхүү “төрийн эрхийг авах” ажиллагаанд оролцсон “ялтан” болж байна. Гэтэл С.Амарсайхан ардчилсан Монгол Улсад байж болох үйл явц төдийгүй хувь хүний байр суурь, итгэл үнэмшил, сонголт төдий байлаа. Харамсалтай нь, энэ процессыг хүртэл харлуулах ажиллагааг Засгийн газраас зохион байгуулалттайгаар явуулж, С.Амарсайханы Засгийн хуралдааныг орхин гарч буй бичлэгийг олон нийтэд цацаж орхив. Гэтэл энэ бол Г.Занданшатарын хувийн орон зай, гэр орон нь биш байлтай.

Нөгөөтэйгүүр удаа дараа унасан ч тахимаа өгч сураагүй Г.Занданшатар ямар их өс хонзон санагч гэдгээ дахин батлан харуулж, өөрөөс нь өөр үзэл бодол илэрхийлсэн хэнийг ч болов харлуулан доромжилж нийгэмд хаяж өгч чадахаа ч давхар харуулсан эмгэнэлтэй үйл явдал өрнөв. С.Амарсайханы хувьд Ерөнхий сайдын гаргаж буй үг, үйлдлийг хүлээн зөвшөөрөхгүй учраас эсрэг санал өгсөн. Тиймдээ ч өнөө өглөөний Засгийн газрын хуралдаанд огцрох өргөдлөө өгөхөөр бэлдээд орсныг мэдсэн даруйдаа ажлаас чөлөөлж буй мэтээр бичлэг хийж, урьдчилан тараасан нь Г.Занданшатарыг ямар хүн болохыг бэлхнээ харуулчихав. Х.Бумаа