“Хавчигдсан дундаж давхаргаа хэрхэн аврах вэ” мэтгэлцээнд ХЭН ЮУ ХЭЛЭВ

УИХ-ын чуулганы өнөөдөр (2025.10.31)-ийн нэгдсэн хуралдаан үдээс хойно Улсын Их Хурлын асуулгын цагаар эхэллээ.

Өнөөдрийн асуулгын цаг “Хавчигдсан дундаж давхаргаа хэрхэн аврах вэ” сэдвийн хүрээнд өрнөв. Тодруулбал, УИХ-ын гишүүд эдийн засаг, боловсрол, эрүүл мэнд, дэд бүтцийн хөгжил зэрэг олон салбарыг хамарч, Засгийн газрын бодлого, хэрэгжилтийн талаар тодруулга авлаа.

Асуулгын үеэр Ерөнхий сайд бодит баримтад тулгуурлан хариулт өгч, ирэх оны төсөв, хөрөнгө оруулалтын чиглэл, нийгмийн халамжийн шинэчлэл зэрэг гол асуудлаар байр сууриа илэрхийллээ.

Тухайлбал,

О.Цогтгэрэл: Өнгөрсөн хугацаанд уул уурхайгаас 100 тэрбум доллар олсон байна. Энэ мөнгө хаачсан бэ?

Ерөнхий сайд Г.Занданшатар: Төр үлэмж хэмжээгээр данхайсан. Өнгөрсөн 2024 онд бүр ч данхайсан. Үр дүнд нь төр баяжиж, иргэд ядуурсан

УИХ-ын гишүүн С.Эрдэнэбод: Бага дунд орлоготой иргэдийг инфляцийн дарамтаас хамгаалахад Засгийн газар юу хийх вэ?

Ерөнхий сайд Г.Занданшатар: Инфляцид нөлөөлдөг гол хүчин зүйлийн шалтгаан нөхцлийг арилгахад анхаарч ажиллана. Импортоос хамаарсан өсөлт инфляцид гол нөлөө үзүүлж байгааг анхаарах ёстой.

УИХ-ын гишүүн Ц.Мөнхтуяа: Багш нарыг орон сууцанд яаж хамруулах вэ? Багш нарын нийгмийн асуудлыг дариухан шийдвэрлэж өгнө үү

Ерөнхий сайд Г.Занданшатар: ҮСХ-ны мэдээллээр улсын хэмжээнд 2025 оны 2 дугаар улирлын байдлаар дундаж цалин 2,7 сая төгрөг байна. Гэтэл шинээр төгсөж буй багшийн цалин 1 сая гаруйхан байна. Юун түрүүнд 1-4 жил ажиллаж буй багш нарын цалинг түлхүү нэмнэ. Энэ талаар зарчмын хувьд ойлголцолд хүрсэн. Орон сууцны хөтөлбөрт хамруулах асуудлыг судалж эхэлсэн.

О.Цогтгэрэл: Өрхийн орлогыг хэрхэн нэмэгдүүлж дундаж давхаргаа яаж дэмжих вэ?

Ерөнхий сайд Г.Занданшатар: Өмч хувьчлалаас эхлэн эдийн засгийн бодлого алдагдсан. Эдийн засгийн бүтцээ өөрчлөх 2026-2030 Монгол Улсыг хөгжүүлэх таван жилийн үндсэн чиглэлийг өргөн барьсан. Энэ хүрээнд халамжийн бус хөдөлмөрийг дэмжсэн цогц реформ хийж дундаж давхаргаа нэмэгдүүлнэ” гэлээ.

Нэмж сануулахад, Парламентын үйл ажиллагаанд шинэ соёл, шинэ механизм суулгаж байгаа УИХ-ын асуулгын цаг сар бүрийн төгсгөлийн долоо хоногийн баасан гаригийг 14:00 цагт зохион зохион байгуулагдаж эхэлсэн. Энэхүү мэтгэлцэээнээр Ерөнхий сайд нь хүссэн сэдвээрээ мэдээлэл өгдөг биш гишүүдийнхээ, сөрөг хүчнийхээ, ард иргэдийнхээ асуултад хариулдаг болох юм.