Ц.Даваасүрэн: Төрөө тогтвортой байлгах талаас нь бодож УИХ-ын гишүүний 12 сарын тэтгэмжийг олгох нь зүйтэй. Германд бол бараг бүх насаар нь олгодог
УИХ-ын Төрийн байгуулалтын байнгын хороо, Өргөдлийн байнгын хороо өнөөдөр /2025.11.04/ хамтран хуралдаж, УИХ-ын гишүүнээс буусны дараа олгох тэтгэмжийг цуцлах эсэх асуудлыг хэлэлцэв.
Хоёр байнгын хорооны хуралдаанд 57 гишүүн оролцохоос 36 нь ирцээ бүртгүүлж, УИХ-ын гишүүн О.Номинчимэг хуралдааныг даргалав. Хуралдаанд өргөдөл гаргагч иргэн Ц.Батболд оролцож, гишүүдийн асуултад хариулна.
УИХ-ын гишүүн Ц.Даваасүрэн: Популизм ноёрхсон сошиал орчинд хүмүүс ингэж хандаад байна. Үүний цаана төрийн нууцын асуудал бий. Төрийн нууц өөрөө хугацаатай. Төрийн нууцыг хадгалахын тулд тодорхой гэрээтэй ажиллах ёстой. Өргөдөл санаачлагч Ц.Батболд та бусад орны парламентийг судалж үзсэн үү. Бүх гишүүд нь тийм байгаа. Герман бол бараг насаар нь байгаа байх. Яагаад гэвэл энэ хүн төрийн онцгой нууцтай харьцаж байгаа хүн. Энэ талаас нь төрөө тоогтвортой байлгах талаас нь хандаж бодсон уу.
Эргэн сануулбал, Нийтийн өргөдөл, гомдлын цахим систем https://petition.parliament.mn-д 2025 оны 9 дүгээр сарын 24-ний өдөр иргэн Цогбадрахын Батболд Монгол Улсын Улсын Их Хурлын тухай хуулийн 41 дүгээр зүйлийн 41.9 дэх хэсэг буюу “Хэрэв гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж, ... олгоно” гэсэн заалтыг хүчингүй болгуулах хуулийн төсөл санаачлах нийтийн өргөдлийг санаачилсан байдаг.
Уг өргөдөл нь 2025 оны 10 дугаар сарын 28-ны өдөр Монгол Улсын 18 насанд хүрсэн 100467 иргэний санал авсан байна.
Иймд Монгол Улсын Их Хурлын чуулганы хуралдааны дэгийн тухай хуулийн 95 дугаар зүйлийн 95.3-т “Нийтийн өргөдлийг дэмжсэн иргэдийн саналыг УИХ-аар хэлэлцүүлэн шийдвэрлүүлэхээр хуралдаж эхэллээ.
