Ерөнхийлөгч асан Н.Энхбаяраас “Өргөө” зочид буудлаас гадна “Оргил” рашаан сувилалаа ч буцааж авъя!
Манай улсад Ерөнхийлөгчөөс авахуулаад УИХ-ын гишүүд, Засгийн газрын сайд нар гээд хэт давуу эрх, дабль стандарт эдэлдэг улстөрчид өдрөөс өдөрт нэмэгдэж байна. Адаглаад, УИХ-ын гишүүд нь ахин сонгогдож чадахгүй бол 12 сарын цалингаа бүтэн жилийн хугацаанд “халааслаж” суудаг бол Ерөнхийлөгч асан Н.Энхбаярын ярьснаар бол бид үе үеийн төрийн тэргүүнүүдэд газар бэлэглэх ёстой юм гэнэ! Бүр УИХ-ын тогтоол байдаг юм байх.
Цагтаа улсын хаан урт шар дээлтэй хүн гэгдэтлээ төрийн өндөр албан тушаалуудад эзэн сууж, олон жил засагласан экс Ерөнхийлөгч Н.Энхбаяр эцэстээ оймсоо гозолзуулан баривчлагдаж байв. Уг баривчилгаа нь үйлдсэн хэрэг, кэйс гэхээсээ илүү улсын хаан мэт олон жил засаглаж, авилга, албан тушаалын хэргийг цэцэглүүлсэн учраас намаас нь өгсөн ухамсрын шанаа байсан гэж болно. Ингээд ч тэрээр “хүмүүжээгүй” бололтой. Ингэж хэлэхийн учир нь хуучнаар Гутлын 22 буюу одоогийн Өглөөний гудамжинд байрлах “Өргөө” зочид буудлыг Н.Энхбаярын хамаарал бүхий хүмүүс 10 гаруй жил хууль бусаар эзэн суусан байдаг. Саяхнаас тус газрыг нийслэл өмчдөө эргүүлэн авах талаар мэдэгдсэн.
Хотын өмч л бол айлын хашааны буланг хүртэл танаж хасахыг шаардах болсон Х.Нямбаатар даргын нэг гавьяа нь нийслэл хэмээх их айлын өмчийг бүртгэж, энэ мэтээр хууль бусаар эзэмшиж, завшиж байсан хувь хүмүүс болон аж ахуйн нэгжүүдтэй ил дайн зарлаад жил гаруй болж байгаа. Эмийн үйлдвэр, элэгний эмнэлэг /Хатанбаатар эмчийн/, Урт цагаан гэх мэт нийслэлийн /олон нийтийн/ өмч ч гэлээ хувь хүмүүс эзэмшиж, түрээсэлж, ашиглаж ирсэн олон обьектуудыг төрд эргүүлэн авсан. Сүүлийнх нь бараг “Өргөө” зочид буудал юм уу даа.
Гэтэл үүнийг эсэргүүцсэн экс Ерөнхийлөгч Н.Энхбаяр “Ерөнхийлөгч байсан бүх хүнд улсаас 1 га газар өгдөг. Би аваагүй л байгаа. Харин ч Х.Нямбаатар надад 1 га газар өгөх ёстой. Ц.Элбэгдоржийн үед Хуримын ордны хойд талын байшингийн ёроолоор газрын зөвшөөрөл өгсөн. Тэгэхээр эргэн тойрон дахь газрыг нь хэн нэгэн хүнд өгнө шүү дээ. Үүнээс урьтаж би Д.Сумъяабазар даргад хандаж, надад багахан газар өгсөн юм. Х.Нямбаатар намайг Д.Сумъяабазарыг шантаажилсан гэсэн. Би Хуримын ордны гаднах газрыг өргөдлөө гаргаж, шийдүүлсэн. Миний асуудал жижиг асуудал. Монгол Улсын Ерөнхийлөгч байсан хүний хувьд 1 га газраа ч хөөцөлдөж, сүйд болсонгүй. Би газраа өгөхгүй. Одоо Сангийн сайдаас мөнгө гуйх гээд явж байна. Хархорин хотын асуудлаар уулзана” хэмээн ил цагаан адарсан.
Монгол Улсын анхны Ерөнхийлөгч, төрийн тэргүүнээр 7 жил ажилласан П.Очирбат агсанд анхны Ерөнхийлөгч гэдэг утгаар Гэрлэх ёслолын ордны зүүн талд 1 га газар бэлэглэсэн байдаг. Өөрөөр бол Ерөнхийлөгч бүрт 1 га газар бэлэглэдэггүй харин П.Очирбат агсан ардчилсан Монгол Улсын анхны Ерөнхийлөгч учраас Монголын ард түмнээс онцгойлон бэлэг өгсөн хэрэг. Н.Энхбаярын ярьж байгаа шиг Ерөнхийлөгч бүрд газар бэлэглэлэг УИХ-ын тогтоол бүү хэл журам ч байхгүй юм.
Гэтэл УИХ-ын гишүүн, ЦХИХХ-ны сайд, хүү Э.Батшугар нь хүртэл төрийн сайдын индэр дээрээс “Өргөө” зочид буудлыг буцааж өгөхгүй. Бидний өмч хэмээн мэдэгдэж байгаа юм.
Бүх амьтан тэгш эрхтэй. Гэхдээ гахай илүү давуу эрхтэй гэдэг журам тэдэнд үйлчлэх ёстой бололтой юм. Үнэндээ энгийн иргэд нь 0.7 га газраа ч олж авах гэж үйлээ үзэж, үсээ зулгааж ирсэн.
Гэтэл Ерөнхийлөгч байсан хүнд улсаас 1 га газар бэлэглэх ёстой гээд ичих ч үгүй мэдэгдэж зогсоо Н.Энхбаяр гэж хүнд ичих нүүр байна уу гэж асуумаар. Тэгж ярьвал “Оргил” рашаан сувилалыг ч эдний гэр бүл эзэмшдэг. Уг сувилалыг ч улс өмчдөө эргүүлэн авах асуудлыг хөндөх ёстой юм биш үү!
Ахин хэлэхэд Монгол Улсын гурав дахь Ерөнхийлөгч Намбарын Энхбаяр гэдэг хүн нэгэн цагт Монгол төрийг зайдагнаж, бүхнийг харцаараа хөдөлгөж, авлигын загалмайлсан эцэг болтлоо занхайж явсан өдрүүдийг ард түмэн биш гэхэд Ардын намынхан нь мартаагүй гэдэгт итгэж байна. Төрийн албан тушаалыг үнэ хаяалцуулан “зарж”, ард түмний хөрөнгийг намдаа, хувьдаа, гэр бүлдээ хэрхэн яаж завшиж, эзэмшиж туйлж ирсний нэг жишээ нь хотын А бүсэд байрлах бүхэл бүтэн обьектыг гэр бүлийн хэрэгцээндээ эзэмшиж эцэст нь эзэн нь юмаа мэдэж өмчөө авья гэхэд анхны Ерөнхийлөгчтэй барьцаж, ард түмнээсээ га, га-гаар нь газар нэхээд зогсож байна. Та ичихгүй байна уу, Н.Энхбаяр Ерөнхийлөгч өө!
Монголын төр, Монголын ард түмэн танд, танай гэр бүлд ямар өртэй юм бэ?
М.Үүрийнтуяа
