Л.Оюун-Эрдэнийн санаачилсан "Ухаа худаг"-ийн асуудлаар Хянан шалгах Түр хороо байгуулах санал хураалтад маргаан гарч, хойшлогдлоо

УИХ-ын нэгдсэн чуулганы өнөөдрийн /2025.11.07/ хуралдаанаар 

-Монгол Улсын 2026 оны төсвийн тухай, Үндэсний баялгийн сангийн 2026 оны төсвийн тухай, Нийгмийн даатгалын сангийн 2026 оны төсвийн тухай, Эрүүл мэндийн даатгалын сангийн 2026 оны төсвийн тухай хуулийн төслүүд /Засгийн газар 2025.09.01-ний өдөр өргөн мэдүүлсэн, гурав дахь хэлэлцүүлэг/

-Монгол Улсын 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл /Засгийн газар 2025.09.01-ний өдөр өргөн мэдүүлсэн, хоёр дахь хэлэлцүүлэг/

 “Хянан шалгах түр хороо байгуулах тухай” Улсын Их Хурлын тогтоолын төсөл /Улсын Их Хурлын гишүүн Л.Оюун-Эрдэнэ нарын 33 гишүүн 2025.10.06-ны өдөр өргөн мэдүүлсэн/-ийг тус, тус хэлэлцүүлэхээр төлөвлөсөн. 

Эдийн засгийн байнгын хорооны санал, дүгнэлтийн дагуу Ухаа худагийн асуудлаар хянан шалгах түр хороо байгуулах асуудлаар эхний санал хураалт явуулахад 92 гишүүн оролцсоны 50 хувь нь дэмжсэн тул санал дэмжигдээгүй. Гэвч дэмжсэн гишүүдийн санал "дэмжигдээгүй" болж өөрчлөгдсөн тул маргаан үүсэв.

Тухайлбал, УИХ-ын гишүүн О.Алтангэрэл, Х.Баасанжаргал нарын дэмжсэн гэх санал татгалзсан гэж гарч ирсэн. Иймд ирэх долоо хоногийн чуулганы хуралдаан хүртэл санал хураалтыг хойшлууллаа.