Нэг хүнд зориулж хууль засахын оронд нийгмийн асуудал руугаа өнгийнө үү, эрх баригчид аа!

Өнгөрсөн амралтын өдрүүдэд 2255 төлөөлөгчтэй МАН-ын их хурал болж тус хуралдаанаар Тэргүүн шадар сайд, ЗГХЭГ-ын дарга Н.Учрал 94.95 хувийн саналаар МАН-ын даргаар сонгогдсон юм. МАН-ын даргын тамгаа гардаж авсан Н.Учрал “Эв нэгдлийг хангаж ажиллахын зэрэгцээ авлига, ашиг сонирхлын хэргүүдэд манай намын чамгүй олон нөхөд нэр холбогдож, баялгийн хараал, авлигын намагт улс, үндэстнээрээ шигдэх аюул ойрхон ирснийг нуун дарагдуулж, хаацайлан хамгаалах эрх хэнд ч байхгүй” гэснээс гадна Ерөнхий сайд Г.Занданшатарын Засгийн газрын бүтцэд өөрчлөлт оруулахгүй” гэдгээ мэдэгдсэн нь тус хурлын бараг хамгийн чухал мэдэгдэл, үр дүн байсан гэж болно.

Учир нь энэ намрын улс төрийн ужгирсан хэрүүл тэмцэл гудамжнаас шууд Ерөнхий сайд болсон Г.Занданшатар гэж хүний шуналаас үүдсэн билээ.  

Гэтэл өнөөдөр /2025.11.17/ Ардчилсан нам, О.Цогтгэрэл гишүүн “Намын дарга УИХ-ын дарга байж болохгүй” гэсэн хуулийн төсөл санаачилсан гэдгээ мэдэгдэв. Уг хуулийн зорилго нь нэг хүнд зориулагдсан, агуулга нь Ерөнхий сайд Г.Занданшатарыг суудлаас нь буулгах бүхэлдээ улс төрийн ужгирсан зөрчил тэмцлийг үргэлжлүүлэх МАН руу чиглэсэн байр суурь байлаа. Хэдийгээр сөрөг хүчний хувьд хийж болох улс төр ч гэлээ нөгөө талаасаа парламентад улс орны, хөгжлийн төлөө хууль санаачилж, батлах ёстой УИХ-ын гишүүд хэдий болтол нэг хүнд зориулсан, улс төржсөн агуулгатай хууль санаачилж, батлуулж улс гэрээрээ тоглох вэ. Тэгээд ч нэг улс төрийн намын дарга нь Ерөнхий сайд байна уу, УИХ-ын дарга байна уу АН-д цаашилбал ард түмэнд ямар ч хамаагүй асуудал юм.

Хэрэв энэ хууль батлагдвал Ерөнхий сайд Г.Зандашатар огцорч дахин шинэ Засгийн газрын кабинет бүрдэх нүсэр ажил, сандал суудлын төлөөх тэмцэл гээд бүх зүйл эхний цэгээсээ эхэлнэ. Үр дүнд нь хэн хохирох вэ? Ард түмэн, татвар төлөгчдийн мөнгө л урсана.

МАН-ын хоёр сар үргэлжилсэн улс төрийн зодооны ард сургууль нь багшгүй, эмнэлэг нь эмчгүй, ард түмэн нь шатахуунгүй өвөл мэт намрыг зутруухан өнгөрүүлсэн. Энэ нөхцөл байдал үргэлжилбэл яах вэ.

Товчхондоо бүхэл бүтэн 2 сар, намаржин улс төржсөн та нарын хэрүүл тэмцлээс жирийн иргэд хэдийнэ залхчихаад байна. Одоо бөөр нь бөгсөндөө, цэр нь цээжиндээ урд урдах ажлаа хийцгээнэ үү.

М.Үүрийнтуяа