МАН-ын дараагийн генсек хэн байхаас Н.Учралын хувь заяа шалтгаална
Гурван өдөр үргэлжилсэн МАН-ын Их хурал өндөрлөж өнөөдөр намын Бага хурал шинэ бүтэц бүрэлдэхүүнээрээ хуралдаж байна. Өнөөдрийн Бага хурлаар МАН-ын Ерөнхий нарийн бичгийн дарга болон нарийн бичгийн дарга нарыг томилж, чөлөөлөхөөс гадна УЗ-г сонгох юм. Шинэхэн намын дарга Н.Учралын хувьд намын гал тогоогоо Я.Содбаатарт үлдээх үү, үгүй юу гэдгээ өнөөдөр шийднэ.
Хэрэв Я.Содбаатар албан тушаал дээрээ хэвээр үлдвэл гомдогсдын төлөөлөлтэй дахин ширээний ард суух шаардлагатай болно. Үгүй гэвэл Н.Учрал намын гал тогоогоо хэнд өгөх вэ гэдгээ сайтар тооцоолж, шийдэх гаргалгаатай нүүр тулна. Учир нь намын генсек гэдэг намын даргаасаа чухал шахуу албан тушаал буюу хаяанд байгаа 2027, 2028 оны улс төрийн сонгуулиудад МАН ялах уу, ялагдах уу гэдэг хувь заяа намын гал тогоог хэн барихаас ихээхэн шалтгаалах юм.
Хоёрдугаар хувилбар, Ардын намын генсекээр санаанд оромгүй нэгэн тодрох магадлалтай.
Намаржин дээр, доороо орсон улс төржилтийн үеэр Ардын намын дараагийн генсект экс хотын дарга Д.Сумъяабазар, Намын байгуулалтын газрын дарга Д.Пүрэвдагва, одоогийн хотын дарга Х.Нямбаатар нарын нэрс яригдсан.
Дээрх улстөрчдөөс МАН-ын гал тогоог базаж чадах зангараг, нөлөө экс хотын даргад байх магадлал өндөр. Харин Д.Пүрэвдагвын тухайд залуу, туршлагагүй боловч У.Хүрэлсүхийн дэмжлэгээр, ногоон гэрлээр сонгогдох магадлалтай. Учир нь тэрээр Хүүкийн экс хүргэн билээ.
Харин Хотын дарга Х.Нямбаатарын хувьд намын дарга Н.Учралтай нийслэлийн намын хороогоо авч үлдэхээр бүхий л тохироогоо хийсэн гэж зарим эх сурвалжууд хэлж буй.
Гэхдээ МАН-ын генсекийн суудлыг мундагдаж авсан Я.Содбаатарын хувьд тийм ч амархан суудлаа тавьж өгөхгүй нь ойлгомжтой.
Энэ удаагийн 597 гишүүнтэй болсон Бага хурлын олонх нь намын анхан шатны нэгжээс сонгогдсон гэдэг утгаараа Я.Содбаатар болон Д.Пүрэвдагва нарт эрсдэлтэй байх магадлал өндөр. Учир нь хоёулаа У.Хүрэлсүхийн хүмүүс. Намаа бүхэлд нь нэг хүний гарт өгөхийг МАН-ын гишүүд дуу нэгтэйгээр хүлээн зөвшөөрөх үү гэх асуулт. Ямар коммунист улс биш дээ. Үгүй ядахдаа л Казакстан, Н.Назарбаевын араас орчихмооргүй л байна шүү дээ гэх бодол захын гишүүнд байгаа болов уу.
Тэгээд ч Н.Учрал намын аливаа сонгуульт ажил болон сонгуульд нэр дэвшүүлэхдээ тооноор биш хаалгаар орох зарчмыг баримтална гэдгээ хэлснийг мартаж болохгүй.
Товчхондоо бараг задрахын наана байгаа МАН-ын гал тогоог базах генсекийн албан тушаалд хэн очих, хэрхэн ажиллах нь хэзээ хэзээнээсээ чухал өдрүүд. Бараг хоёр сарын хоорондын тийрэлцээн дундаа дараагийн сонгуульд ялагдах замаа засчихав уу гэж харагдаж буй эгзэгтэй үе гэдгийг Н.Учрал тооцоолж байгаа болов уу.
Хамгийн чухал нь намын анхан шатны нэгжүүд болон намын удирдлагууд дунд координат хийх чадвартай, Н.Учралд нүд, чих болох хүн хэн бэ, түүний фракцид бий юу гэдэг асуулт. Энэ шаардлагад тэнцэх улстөрч ховор буюу шулуухан хэлэхэд У.Хүрэлсүх болон Н.Учралын фракцид байхгүй.
Энэ бүхнийг тооцож генсекийн асуудлыг ахиж анхаарлын төвд авчрахгүй хэмээн Я.Содбаатар хэвээр үлдвэл экс генсек Д.Амарбаясгалан шиг ялалтын менежер байж чадах уу гэдэг асуулт өөрөө асуудалтай. Учир нь Я.Содбаатар У.Хүрэлсүхийн “шивэгчин” гэдэг имижээс өөр ялгарал, тодотголгүй, намын гишүүддээ манлайлал үзүүлэх хэмжээний харизмгүй ядахдаа л улс төрийн карьер нь эцэслэгдэж буй нэгэн гэдгийг бас мартаж болохгүй.
Эцэст нь хэлэхэд энэ удаагийн МАН-ын Их хурал Ерөнхийлөгч У.Хүрэлсүхийн хүслээр /зургаар/ явагдаж дууссан. Гэхдээ МАН-д 2027 болон 2028 оны сонгуулиудад ялалт байгуулах намын дарга хийгээд ЕНБД хэрэгтэй болохоос биш хэн нэгний хүслийг гүйцээж, газардахад нь зөөлөн дэвсгэр болох бирд хэрэггүй юм.
Х.Бумаа
