Өвлийн сонгууль: УИХ-ын гишүүд нь айл бүрийн хаалгаар шагайж, эм танг нь халбагадаж өгөх нь дамжиггүй биз

Өнөөдөр УИХ-ын чуулган ээлжит бусаар хуралдаж Эдийн засаг хөгжлийн сайдаар Ж.Энхбаяр, ХХААХҮ-ийн сайдаар М.Бадамсүрэнг томилж, тангараг өргүүлэх гэж байна.

Сүүлийн өдрүүдэд Улаанбаатар хот даяар томуу, томуу төст өвчний дэгдэлт эрчээ авч улсын эмнэлэгүүдийн оочер дараалал дийлдэхээ болив. Өвчиндөө зовиурлаж, уйлж, шаналсан хүүхдүүд эмнэлэгийн шалаар зулж байна. Гэтэл сонгуулиар л ойрхон байдаг төрийн эрх баригчид нь үзэгдэж харагдах нь битгий хэл сандал суудлаа зүүдэлж сэрсээр хуваарьгүй өдөр хүртэл хуралдаж, тамга тэмдгээ өвөртлөхөөр яарч явна. Ард түмний сөхөрч халаглаж, шаналж уйлах нь тэдэнд огтхон ч хамаагүй гэлтэй.  

Хэрэв яг өдийд сонгууль болж байсан бол, УИХ-ын гишүүд нь айл бүрийн хаалгаар шагайж, хайр халамжаар бөмбөгдөж, эм танг нь халбагадаж өгөх нь холгүй байх байсан биз. Учир нь улс төрийн намуудын амлалтууд нь цаасан дээрээ өтөлсөн мөрөөдлийн жагсаалт болсныг тэнэг хүн ч ойлгох болсон. Эргэн сануулахад,

2016 оны УИХ-ын ээлжит сонгуулиар МАН мөрийн хөтөлбөрөөрөө 5 чухал зүйлийг онцолсон нь “Иргэдээ ядуурлаас аварч, эдийн засгаа ядуурлаас аварч эх орноо өрнөөс салгаж, төрийн дампуурлыг засч, тэгш журамт баян хүчирхэг тэгш журамт Монголоо цогцлоож чадна” гэж байлаа. Тус нам мөрийн хөтөлбөрийн 2.6.2-т “Дотооддоо нэмүү өртөг шингэсэн бүтээгдэхүүний боловсруулах үйлдвэрлэлийг хөгжүүлж ДНБ-д эзлэх хувийг 20 хувьд хүргэнэ” гэж тусгасан байдаг.

Харин 2024 оны УИХ-ын ээлжит сонгуулийн онцлох 5 амлалтыг сануулбал,

• Эрүүл мэндийн даатгалын шинэчлэлийг хийх замаар иргэдэд ирэх санхүүгийн дарамтыг багасгана.
• Эрүүл мэндийн даатгалыг багцын системд шилжүүлж, даатгуулагч өөрт хэрэгцээтэй багцыг сонгодог тогтолцоонд шилжинэ.
• Эрүүл мэндийн яаралтай тусламжид шаардлагатай техник хэрэгслээр хангаж, нисдэг тэргийг яаралтай тусламжийн үйлчилгээнд нэвтрүүлнэ.
• Баялгийн сан, Нийгмийн даатгалын сангаар дамжуулан төр, хувийн хэвшлийн түншлэлээр иргэдийг орон сууцжуулах эрх зүйн орчинг бүрдүүлнэ.
• Ахмадын хөдөлмөр эрхлэлтийг дэмжих, орлогыг нэмэгдүүлэх, мэдлэг туршлагаа залуучуудад өвлүүлж үлдээх нөхцөлийг бүрдүүлнэ гэсэн байдаг.

Гэвч өнөөдрийн бодит байдал дээр амхамууд нь тэтгэвэрийн асуудлаар улирал дамнан гудамжинд сууж, өвлийн улирал хаалгаа нээж амжаагүй байхад эмнэлэгүүд нь хүний хөлд дарагдаж байна. Ард түмний зовлон болсон энэ өвлийн улиралд намуудын тэнгэрийн амлалтуудын биелэлтийг сонирхож энэ өдрүүдэд сонгууль явуулмаар ч юм шиг.

Даанч хахир хатуу өвлийн ардаас сонгуулийн сарууд залгадаг жамтай. Ингээд хэд арван төгрөгөөр сонгуулийн саналаа худалдсан ард түмэн нь шангаа хүртэж жилийн жилд өвлийн улирал бидний хар өдрүүд болон хувирсаар хэдэн жилийг үдэж байна. Сардаа авсан хэдэн төгрөгөөрөө үр хүүдүүдээ эмнэлэг домлогоор дагуулж, эм танд нь хэдэн зуугаар нь мөнгө зарж, зовж зүдэрч байгаагаа халаглана. Ёстой нөгөө “Жавхлан юм даа” гэдэг шиг. Гэтэл төрд гарсан гишүүд нь зөвхөн төсвийн мөнгөөр яаж хувийн бизнесээ цэцэглэн хөгжүүлэх үү, хэнийг налж аль талд нь багтаж аятайхан албан тушаалд томилогдох вэ гэсэн бодолдоо автаж ард түмэн огтхон ч падгүй мээт алхаж явна.

 М.Үүрийнтуяа