УИХ-ын дарга Н.Учрал төрийн өрх гэрээ өөрийн хүмүүсээр тохинуулж эхлэв

Ерөнхий сайд Г.Занданшатар кабинетаа бүрдүүлж, гарын хүмүүсээ урдуур хойгуураа эгнүүлээд ерөнхийдөө цэгцэрч байна. Сүүлийн томилгоонуудаас сонирхуулахад, ХХААХҮ-ийн сайдаар ажиллаж байсан Ж.Энхбаярыг Эдийн засаг хөгжлийн сайдаар томилж, түүний оронд хөдөө өссөн хөрслөг бор М.Бадамсүрэнг сайдын суудалд заллаа. МАН-ын хагарал маргалдааны араас Ерөнхийлөгч, Ерөнхий сайд нарыг налсан хүмүүс шагналаа гардаж байна гэхэд хилсдэхгүй.

Тэгвэл үргэлжлээд МАН-ын дарга төдийгүй УИХ-ын дарга болсон Н.Учрал гишүүн томилгоонуудаа хийж, ордны өрх гэрээ шинээр төвхнүүлээд тун завгүй байна. Тухайлбал, УИХ-ын Тамгын газрын даргаар өөрийн гарын хүн Б.Батцэцэгийг томилохоор болжээ. Б.Батцэцэг нь эрх зүйч мэргэжилтэй.

2011 оноос Хүнс, хөдөө аж ахуй, хөнгөн үйлдвэрийн яам, Стратеги бодлого төлөвлөлтийн газар, мэргэжилтэн
2016-2018 онд тус яамны Хуулийн хэлтсийн дарга,
2018–2020 Капкорп Монголиа ХХК, Захиргаа, хуулийн хэлтэс, Хуулийн зөвлөх, Монгол Улсын Ерөнхийлөгчийн Тамгын газар, Хуулийн хэлтэс, Ахлах референт,
2021 – 2022 Улсын Их Хурлын тамгын газар, Улсын Их Хурлын гишүүний Ажлын алба, Зөвлөх
2022 – 2022 Цахим Хөгжил Харилцаа Холбооны Яам, Төрийн захиргааны удирдлагын газрын дарга,
2023 – ЦХХХЯ, ТНБД-ын албан үүргийг түр орлон гүйцэтгэгч,
2023 оноос – ЦХХХЯ, Төрийн нарийн бичгийн дарга,
2025 оноос Засгийн газрын Хяналт хэрэгжүүлэх газрын даргаар ажиллаж байна.

Намтраас нь үзэхэд л Н.Учралын гарын хүмүүсийн нэг гэдэг нь илт. Харин ажлын туршлага, мэдлэг чадварын тухайд одоогоор дүгнэж хэлэх аргагүй.

Харин УИХ-ын Тамгын газрын хэвлэл мэдээллийн газрын даргаар Б.Төгсбаяр ажиллах аж. Б.Төгсбаярын тухайд ТВ5-аар овоглогддог ч “Малчин” ТВ-ийн Мэдээний албаны даргаар ажиллаж буй сэтгүүлч Э.Дагиймаагийн хүү. Сөүлийн Их сургуулийн олон нийттэй харилцах, олон нийтийн бодлогын чиглэлээр мэргэжил эзэмшсэн бөгөөд өмнө нь УИХ-ын дарга Н.Учралын хэвлэл мэдээлэл, олон нийттэй харилцах бодлогын багт ажиллаж байсан. Ээжийг нь эс тооцвол сэтгүүлзүйн салбарт ажиллаж, мэдээнд гүйж байсан туршлага байхгүй. Насны хувьд ч залуухан Б.Төгсбаярт чухал алба болох Хэвлэл мэдээлэл, олон нийттэй харилцах ажлаа даатгаж буй нь анхаарал татаж байгаа юм. Магадгүй өөрөө медиад сортоотой, нөгөө талаар ээжийнх нь мэргэжил, туршлагад найдаж буй болов уу.

Угаас төрийн аль ч албанд дарга нь солигдвол дагаад цэргүүд солигдох нь уламжлал болоод удаж буй. УИХ-ын дарга Н.Учрал нь угтаа төрийн албыг цомхон болгоно гэж хэлдэг хэдий ч одоогоор ямартай ч өөрийн багаа бүрдүүлж буй бололтой. Эргэн сануулахад, саяхан Тэргүүн шадар сайд Н.Учрал 9 зөвлөхтэй гэх мэдээлэл гарч шүүмжлэл дагуулж байсан удаатай.

Д.Үүрийнтуяа