Сураггүй байсан С.Батбаатар сайдын суудалд тухлаад хамтран зүтгэгчдээ илүү үзэв

МАН-ын талцал хуваагдал арай гэж нэг тийш болж дуусахад дараагийн намын хуваагдал мөн хүчээ авч эхлэв. Улс төрийн намууд хоёр хуваагдахгүй л бол болдоггүй бололтой шүү. Хоёр тамгатай хүртэл болж байсан түүхтэй. 2024 оны сонгуулийн өмнө бараа сураггүй байсан Иргэний зориг ногоон нам дуучин Нарантуяа-Нарагийн нүүр царайгаар гарч ирсэн гэж хэлж болно.

Их хурлын сонгуулиар таван суудал авч одоо намын дарга нь бүр сайдын сэнтийд залраад байгаа. Ингээд ч болов нэг юм танигдаж яваа намаа улам усалж тордож, эмхэлж цэгцлэхийн оронд тарлан бутаргах дээрээ тулсан нь намын дарга Б.Батбаатартай холбоотой. Тодруулбал, Өнгөрсөн амралтын өдөр /2025.11.29/ Иргэний зориг ногоон намын их хурал Төрийн ордонд болсон боловч хоёр хуваагдан хуралджээ.

ИЗНН-ын их хурлаар намын дүрэм шинэчлэх тухай хэлэлцсэн ч намын дарга Б.Батбаатарын ураг төрлийн хүмүүс намын удирдах албан тушаалд байгааг эсэргүүцэн УИХ-ын гишүүн Р.Батболд, УИХ-ын гишүүн М.Нарантуяа (Нара), намын дэд дарга С.Батбаатар нар анхан шатны гишүүдийн хамт тусдаа хуралдан шаардлага хүргүүлсэн байна.

Энэ талаар УИХ-ын гишүүн М.Нарантуяа-Нара хэвлэлд ярихдаа "УИХ-д намаа дөрвөн суудалтай болгохын төлөө маш их хичээж ажилласан. Хөрөнгө, хүчээ шавхсаны дүнд намайг дэд даргаас буулгаж байна. Хэдий надад улс төрийн туршлага байхгүй, цагаан цаасаараа байгаа ч гэсэн өмнө нь УИХ-д 2004-2008 онд нэг удаа сонгогдсон Б.Батбаатар даргыг хамаагүй муу туршлагатай улс төрч гэж хэлнэ. Намын дарга ах, дүү, төрөл төрөгсдийнхөө хүрээнд хурал зохион байгуулсан гэж хэлж болно. Нэг намын даргын саналын эрхтэй Үндэсний хороонд намын дарга нь ах, дүү гуравтайгаа хамт байгаа нь шударга явдал уу. Нэгэнт ард түмний итгэлийг олж авсан ИЗНН шударга бус байдлыг бий болгосныхоо төлөө өөрөөсөө үлгэрлэж татан буугдах ёстой" гэв.

Ишиг эврээ ургахаар эхийгээ мөргөнө гэдэг шиг С.Батбаатар дарга сайдын суудалд тухлаад хамтран зүтгэгчдээ илүү үзэх нь эр хүний мөн чанартай лав нийцэхгүй биз ээ.

М.Үүрийнтуяа