Санасандаа хүрсэн МАН-ын ах нар “ичээндээ оров”
УИХ-ын гишүүн Х.Тэмүүжины хэлдгээр “Энэ хэрүүл маргаан дууссаны дараа арынхаа өрөөнд тэврэлдээд, шалгасан ч юм байхгүй, шийдвэрлэсэн ч юм байхгүй, дараагийн үе гарч ирсэн ч энэ л хэвээрээ байна” гэсэн нь чухам үнэн болоод явчихлаа.
Санасандаа хүрч, сарвайснаа авсан МАН-ын ах нар ичээндээ оров. Хоёр сарын өмнө МАН-ын дарга, Ерөнхий сайдын суудалдаа тухалж үлдэхэд арслан бартай ч гар барилцахад бэлэн явсан Г.Занданшатар өнөөдөр хаачив. Засгийн газрын хуралдаан дээр хэдэн хүмүүсийг халж, солихоос өөр юу гийгүүлэв.
Ердөө сар гаруйн өмнө /2025.10 сар/ Ерөнхий сайд Г.Занданшатар МАН-ын даргын суудлын төлөөх дайнаас болж Хууль зүйн сайд Л.Мөнхбаатарыг ариун цэврийн өрөө ороод гараад ирэх хооронд чөлөөлж, нүүрсний хулгайтай тэмцэхийн тулд Б.Энхбаярыг Хууль зүйн сайдаар томиллоо хэмээн цочтол мэдээлсэн. Нүүрсний хулгайтай зөвхөн Б.Энхбаяр л тэмцэж чадах мэтээр кабинетийн сайдаараа шал арчсан эл явдал бүхэлдээ стандарт бус, ёс зүйн хувьд ч зөвтгөлгүй шийдвэр байв. Ерөөс тэдгээр өдрүүдэд Г.Занданшатарт улс төрчийн ёс зүй, нэр хүнд юу ч хамаагүй зүгээр л дөргүй бух шиг улайрч байсан нь хачин. Хачинсаад байх ч юмгүй л дээ, гудамжнаас У.Хүрэлсүхийн татаасаар гэнэт Ерөнхий сайд болсон түүнд аз, одоор олдсон албан тушаалаа алдвал түүнээс цааш алдах ч юмгүй учраас тийнхүү улайрсан биз ээ.
Юутай ч УИХ-ын гишүүн Б.Энхбаяр Хууль зүйн сайдаар томилогдоод даруй 44 хонож байна. Товчхондоо сар гаруйн хугацаа өнгөрлөө. Сайд болохынхоо өмнө УИХ-ын дарга асан Д.Амарбаясгаланг нүүрсний хулгайч хэмээн цоллож, бүр асуудлаасаа хальж хажуудаа зогсож буй сэтгүүлчдийг хүртэл хулгайчаар нь дуудан гүтгэж асан Б.Энхбаярт өдгөө юу саад болж байгаа юм бол?
Эсвэл Д.Амарбаясгаланг л намаас болоод ҮАБЗ-өөс зайлуулж байвал юу ч хамаагүй бурах эрхийг хэн нэгэн түүнд өгөв үү? Алдарт Админерал, Бортээгийн уурхайтай холбоотой хулгайн асуудал өдгөө шийдэгдчихнэ гэж баймгүй. Товчхондоо нүүрсний хулгайг шил дараалан илрүүлж, хулгайчид дунд сэлэм эргүүлнэ хэмээн тайван сууж тэвчихгүй босон харайж байсан хүн өнөөдөр ажин түжин болжээ.
Төрийн ордны босоо сайд нар ичээндээ орж, Байнгын хороод нь ч хуралдаж чадахаа болив. Санасандаа хүрсэн ах нар саран дээр дүүлж яваа юм болов уу даа.
Сураг дуулах нь Хууль зүйн сайд маань юун нүүрсний хулгай манатай Гэр бүлийн тухай нэмэлт хууль санаачилсан шиг яваа юм байх. Түүнийхээр эр эмийн салж, нийлэх асуудалд төр оролцох юм гэнэ. Эхлээд төрийн өрх гэрээ товхинуулж нөгөө хулгайчдаа хаалга тооноороо гаргах асуудлаасаа ажлаа эхэлбэл сүртэйсэн, Б.Энхбаяр сайд аа.
Эс бөгөөс УИХ-ын гишүүн Х.Тэмүүжингийн хэлдгээр “Энэ хэрүүл маргаан дууссаны дараа арынхаа өрөөнд тэврэлдээд, шалгасан ч юм байхгүй, шийдвэрлэсэн ч юм байхгүй, дараагийн үе гарч ирсэн ч энэ л хэвээрээ байна” гэдэг чухам үнэн болоод явчихлаа.
М.Үүрийнтуяа
