Д.Дорлигжавын дүү хятад иргэнээс 51 тэрбум төгрөгийн хөрөнгө оруулалт аваад залилжээ
Уурхайн олборлолтын ажил эхлүүлж, олсон ашгаа хуваана гэж хүний итгэлээр хөрөнгө оруулалт авчхаад юу ч болоогүй юм шиг хөрөнгө оруулагчаа залилж, бүр болоогүй айлган сүрдүүлж, дарамталдаг, эрх мэдлээрээ далайлгадаг хэрэг гарсны эзэн холбогдогч нь УЕП асан Д.Дорлигжав, түүний дүү Д.Баатар нар байв.
Эл хэрэг чухам хаанаас яаж эхэлснийг тайлбарлавал БНХАУ-д нүүрсний бизнес эрхэлдэг иргэн Ли Жан Хуа 2017 оноос Сүхбаатар аймгийн Сүхбаатар суманд байрлах “Олгой булаг” ХХК-ийн “Төхөм”-ийн уурхайд хөрөнгө оруулж, хамтран ажиллахаар болжээ. Тухайн үед тус "Ойн булаг" ХХК-ийн Гүйцэтгэх захирлаар Д.Эрдэнэ, хувьцаа эзэмшигчээр Д.Дорлигжавын дүү Д.Баатар, Д.Даваадэмбэрэл, С.Гомборагчаа, Б.Батбилэг нар байжээ.
Дээрх иргэдээс Д.Баатар гэгч нь өөрийгөө Улсын ерөнхий прокурор Д.Дорлигжавын төрсөн дүү хэмээн Ли Жан Хуагийн итгэлийг нь олж, хамтран ажиллахаар болсон байна. Талууд гэрээгээ 2017.06.06-ний өдөр байгуулжээ. Тус гэрээнд “...Хөрөнгө оруулагч тал уурхайн бүхий зардал хөрөнгө оруулалтыг бүрэн хариуцаж “Олгой булаг” ХХК “Төхөм” уурхайн 52 хувийг шилжүүлж өгнө, уурхайн нөөцийг дуусах хүртэл хамтран ажиллахаар тохиролцсон гэж заасан байна.
Иймд гэрээнд зааснаар хөрөнгө оруулагч тал буюу Ли Жан Хуа 2017-2021 оны хооронд "Ойн булаг" ХХК-д шаардлагатай бүх хөрөнгө оруулалт хийж, нийтдээ 51 тэрбум гаруй төгрөг зарцуулжээ. Хөрөнгө оруулалтад юу багтасныг тодруулбал, 100 гаруй автомашин, техник тоног төхөөрөмж, 20 км сайжруулсан зам засварын ажил, уурхайн кемпийн бүтээн байгуулалт, тохижилтын ажил, хөрс хуулалт, тээвэрлэлт, Төхөмийн уурхайн Монгол улсад төлөх бүх төрлийн татвар, хураамж зэрэг аж.
Ингэж явсаар 2020 онд корона вирус дэгдсэний улмаас хөрөнгө оруулагчид Монгол Улсад ирэх боломжгүй нөхцөл байдал үүсэж, 2021 оноос “Олгой булаг” ХХК уурхайн олборлолтын ажлаа бие даан хариуцан зохион байгуулах болж. Чухам энэ үеэс “Олгой булаг” ХХК гэрээний заалтаа зөрчиж хөрөнгө оруулагч талыг хамтын ажиллагаанаас гаргасан байна.
Тухайлбал, нүүрсний нийлүүлэгт, тээвэрлэлтийг зогсоож, гуравдагч компанитай хамтран олборлолт, тээвэрлэлт, борлуулалт хийж эхэлжээ.
“Олгой булаг” компанийнхан хөрөнгө оруулагч талтай байгуулсан дээрх нүүрс худалдах гэрээгээ зөрчин тэдний мөнгөөр боловсруулсон нүүрсээ “Мен дун энержи” компанид бус “Андын илч” ХХК-д нийлүүлж, ихээхэн ашиг олжээ. Ингэхдээ нэг тэрбум шахам төгрөгийн орлого олсон ч өнөөдрийг хүртэл гэрээнд заасан 52 хувиа шилжүүлээгүй, хөрөнгө оруулагч талаа хамтын ажиллагаанаас хүртэл гаргасан байна.
Гэрээ зөрчсөн энэ үйлдлээс талуудын маргаан эхэлжээ. Хөрөнгө оруулагч талаас маргаанаа шийдье гэхэд УЕП асан Д.Дорлигжавын төрсөн дүү Д.Баатар “...Та нар мөнгөө казино тоглоод алдсан гэж бод, хуулийн байгууллагаар яваад нэмэргүй бүгд манай тал...” гэж хэлэн, хамтын ажиллагаанаас хөөсөн байна.
Ингээд 2021 оны арванхоёрдугаар сараас Ли Жан Хуа Цагдаагийн байгууллагад ханджээ. Чухам энэ үеэс хөрөнгө оруулагч талынхаа бизнесийн нэр хүнд халдаж, Ти Жан Хуаг сэтгэл санааны дарамтанд оруулаад зогсохгүй биед халдаж, айлган сүрдүүлэх, дарамтлах, бэртэл учруулах зэрэг асуудлууд удаа дараа гарсаар байгаа аж.
Цагдаагийн байгууллагад хандсан гэгдэж байгаа ч хэрэг одоог хүртэл шийдэгдээгүй хэвээр. Энэ мэт гаднын хөрөнгө оруулагчдыг залилж, луйварддаг явдал удаа дараа гарч байсан бөгөөд энэ нь дараа дараагийн хөрөнгө оруулагчдыг үргээдэг халтай.
