Улаанбаатар номын сангийн газрын талыг Япончуудад хэн “зарсан” бэ?
Нийслэлд газрын талаарх маргаан, газрын наймаа жил ирэх бүр цэцэглэсээр ирсэн. Үе үеийн Засаг дарга нарын авилга, хээл хахууль, зах замбараагүй газар олголтоос өнөөдрийн Улаанбаатар хотын зай завсаргүй бетонон ширэнгэ бий болсон түүхтэй. Зарим нэр бүхий эрхтэн дархтнууд газрын наймаачин гэдгээрээ ч алдартай. Хотын төв А зэрэглэлд байрлах өндөр өндөр орон сууцнуудаас авахуулаад гол горхины эрэг бүр цаашлаад дархан цаазат Богд уулын энгэрээр хүртэл баячуудын хаусууд ярайж буй нь чухамдаа газрын хууль бус наймааны үр дүн юм.
Тухайлбал, Эрчим хүчний сайдаар олон жил ажилласан Б.Чойжилсүрэнгийн “Хурд” группийн Төв цэнгэлдэхийн хажуудах Рапид, Нарны хороолол гэх мэт бетонон ширэнгэ мэт хотхонууд. Мөн түүнчлэн Шадар сайд асан С.Амарсайхан Туул голын эрэг дагуух газруудыг түүж, бургасыг нь хядаж том том хаус сүндэрлүүлсэн. Цаашилбал нэгэн цагт хотынхны өвөлдөө очиж агаар салхи эдэлж, цана чаргаар гулгадаг байсан Хийморийн овоо, Бага тэнгэрийн амыг УИХ-ын гишүүн асан Ц.Анандбазар тэр чигт нь бетонон ширэнгэ болгосон гэх мэтээр тоочоод байвал хүрээний бузар цаашаа жагсаалт гарч ирнэ.
Улс төр, бизнесийн олигархиудын газрын мафи дээрх мэт бол нэмээд төрийн байгууллагуудын газрын наймаа, хулгай бас нэг ердийн жишиг болсон. Дунд сургуулиудаас авахуулаад улсын театруудын дарга нар улс нийтийн өмчлөл дэх хажуу хавирганы газруудаа ханцуй дотроо наймаалчихдаг нь бас нууц биш. Үүний нэг жишээ нь хотын А бүсэд байрлах Д.Нацагдоржийн нэрэмжит Улаанбаатар төв номын сангийн залгаа урд байрлах “Kawai Mongolia” компанийн барилгын газар нь угтаа нийслэлийн өмч. Гэтэл тус газарт Япон эзэнтэй сургалтын төвийн барилга сүндэрлэсэн нь сонирхол татна.
Тодруулбал, тус газрыг Улаанбаатар төв номын сангийн захирал болон бусад нөлөө бүхий эрх мэдэлтнүүд Кавай гэх Япон эзэнтэй төгөлдөр хуурын сургалтын төвд зарсан байх магадлалтай гэх мэдээлэл бидэнд ирсэн юм.
Нацагдоржийн нэрэмжит Улаанбаатар хотын төв номын сангийн захирлаар Д.Индра 2018 онд томилогдож байв. Олон нийт Монголчуудын хүндэтгэдэг яруу найрагч О.Дашбалбарын охин гэдгээр нь түүнийг сайн мэднэ.
Д.Индра нь соёл судлаач мэргэжилтэй бөгөөд МУИС-д багшлахын зэрэгцээ Улаанбаатар хотын оюуны төв болсон номын санг удирдаад 7 жил болж буй.
Энэхүү мэдээллийн дагуу бид Улаанбаатар хотын төв номын сангийн захирал Д.Индрагаас тодруулахад,“Улаанбаатар номын сангийн газрын кадастрын зурагт Kawai-ийн барилгын зураг байхгүй. Намайг ажлаа хүлээж авахад Kawai энэ газраа шилжүүлээд авсан байсан. Тиймээс би өөр хувийн байгууллагын газрын талаар яриа өгөх боломжгүй. Шаардлага ч байхгүй” гэсэн юм.
Үргэлжлүүлэн Нийслэлийн газрын албанаас энэ асуудлыг тодруулах гэсэн боловч тайлбар, мэдээлэл өгөх хүн байсангүй.
Тэгвэл “Кавай” гэж ямар байгууллага вэ?
Kawai Mongolia компани нь 100 орчим жилийн түүхтэй Японы хөгжмийн зэмсэг үйлдвэрлэгч “Kawai” ХХК-ийн төгөлдөр хуурыг Монголд оруулж ирдэг байгууллага аж. Мөн давхар төгөлдөр хуурын сургалтын үйл ажиллагаа явуулдаг байна. Тус сургалтанд ихэвчлэн хөрөнгөтэй айлын хүүхдүүд суралцаж, төгөлдөр хуурыг нь худалдаж авдаг. Төгөлдөр хуурын нэг бүрийн үнэ 50-200 сая төгрөгийн хооронд хэлбэлздэг бөгөөд сургалтад суухын тулд заавал төгөлдөр хуурыг нь худалдан авах нөхцөл тавьдаг аж.
Үүнээс үзэхэд, Нийслэлийн газрын алба болон Улаанбаатар төв номын сангийн эрх мэдэлтнүүд хамжиж “Kawai”-д газраа зарсан уу гэх хардлага төрж байгаа юм. Нарийн яривал газраа гадныханд зарснаас өөрцгүй гэсэн үг юм.
Угтаа хотын төвд байрлах Улаанбаатар төв номын сангийн тэрхүү газар ногоон цэцэрлэгт хүрээлэн байгуулж хүүхэд багачуудад ном уншиж судлах, тав тухтай чөлөөтэй орчинг бүрдүүлэх ёстой. Манай хотод Үндэсний цэцэрлэгт хүрээлэнгээс өөр агаар салхинд гарчих цэцэрлэгт хүрээлэн, ногоон байгууламж бараг байхгүй. Уг нь уудам дэлгэр газар нутагтай улс. Гэтэл улсын нийслэл нь битүү бетонон ширэнгэ болсон нь чухамдаа дээрх мэт увайгүй, сэтгэлгүй үйлдэлтэй холбоотой юм.
М.Үүрийнтуяа
