20 тэрбумын залилангийн хэргээр шоронд ороод гарсан “Эрэл”-ийн Б.Эрдэнэбатын хүү Э.Жаргалан гэрийн үйлчлэгч Филиппин эмэгтэйг онц хэрцгийгээр амийг нь бүрэлгэсэн хэргээр аавынд морилох уу?

Толгой баян явсан “Эрэл”-ийн Б.Эрдэнэбат толгой залиланчин, Австри улсын консул байсан гэргий Д.Сэргэлэн нь нөхрийнхөө залилангийн хамтрагч болон хүү Э.Жаргалангийнхаа хүн амины хэргийг нуун дарагдуулсан байж болзошгүй нөхцөл байдал, гашуун үнэн илэрч байгаа өдрүүд. Асуудал хэдийнэ хяналтаас гарч олон нийт улс даяараа энэ гэр бүлийг жигшин зэвүүцэж байна. Асуудал өндрөө авсны нэг илрэл нь Монгол Улсын Ерөнхийлөгч У.Хүрэлсүхт хохирогч цаг бусаар зүй бусаар амиа алдсан Филиппин улсын иргэн Террил Атиензагийн гэр бүлийнхэн хандаад байна.

14 жилийн өмнө амиа алдсан Филлипин улсын иргэний хэргийн үнэ мөнийг олохын тулд Монголын ард түмэн хандив өргөлөө.

Сэтгүүлч С.Будрагчаа Монголын ард түмний өгсөн 19,980,000 төгрөгөөр НУУЦ МАТЕРИАЛУУД эрэн сурвалжлах нэвтрүүлгийн багаараа 2025 оны наймдугаар сард Филиппин улсад очиж, “Эрэл” группийн ерөнхийлөгч Б.Эрдэнэбатын гэрт учир битүүлгээр цаг бусаар нас барсан Террил Атиензагийн хэргийг сурвалжлаад ирсэн. Нэвтрүүлэг цацагдсаны дараа Террил Атиензагийн ар гэрийнхэн Монголд ирж, учир битүүлгээр амь эрсэдсэн хэргийг сэргээн шалгуулахад бэлэн гэдгээ илэрхийлсэн тул тэднийг Монгол Улсад авчрахаар хандивын аян өрнүүлж Монголын ард түмэн нэг өдрийн дотор /2025.12.12/ 38 сая төгрөг хандивлажээ. Анх хүссэн хандивын хэмжээ нь 15 сая төгрөг байсан бөгөөд хандивын аяны дараа ч үргэлжлүүлэхийг хүссэн, хандив өгөхөөр хандсан хүмүүс олон байгаа нь хайр талархал төрүүлж байна. Талийгаач Террил Атиензагийн нөхөр Нило Атиенза болон том охин Риел Атиенза нарыг Монголд авчрахаар төлөвлөсөн. Хандивын мөнгөөр ирэх буцах зардал, зочид буудлын төлбөр, хэвлэлийн бага хурлын заал түрээс, хоолны зардлууд, бусад зардлуудыг тооцжээ. Угтаа бол нэр холбогдсон, ажиллуулаад цалин өгөөгүй Б.Эрдэнэбатынхан төлөх ёстой! Улны гэгддэг тэдний дорд үзэж нүднийхээ булангаар хардаг ард түмэн л өмнөөс нь нүүрээ улалзуулж байгаагаасаа илүүчлэн хандив өгч сууна.

Аав Б.Эрдэнэбатын залилангийн түүх

"Эрэл"-ийн Б.Эрдэнэбат толгой баян УИХ-ын гишүүн, Батлан хамгаалахын сайд явснаа 2020 онд “Номин”-гийн Ш.Баярсайханаас 20 тэрбумыг залилсан хэргээр шүүхдэлцэж 7 жилийн ял авч шоронд орсон байдаг. Мөнгөтэй хүн 3 сар суугаад 100 саяыг төлөөд гарчихсан. 2020 онд "Эрэл" группын Ерөнхийлөгч Б.Эрдэнэбат, эхнэр Д.Сэргэлэн нар 3 банк болон 23 аж ахуйн нэгж, иргэдэд нийт дүнгээрээ 222 тэрбум 327 сая төгрөгийн өртэй болсон талаар мэдээлэл тархсан. Тэдний тавьсан хамгийн бага өр нь 43 сая төгрөг, дээд хэмжээ нь 132 тэрбум 857 сая төгрөгийн өр байх агаад бодит утгаараа “Үндэсний өр үйлдвэрлэгч” болчихжээ гэж хэвлэлүүд бичиж байв.

2023 онд "Эрэл" ХХК нь Хөгжлийн банкнаас 14 сая ам.доллар, 13.2 сая евро, 9 сая ам.долларын гурван удаа зээл авсан гэдгийг тодотгосон. Зээл олгох үед "Эрэл" ХХК-ийн хувьцааг Б.Эрдэнэбат 100 хувь эзэмшиж байжээ. Тухайн үеийн байдлаар зээлийн үндсэн төлбөрөөс ямар ч төлбөр төлөөгүй, үлдэгдэл 127.1 тэрбум төгрөг байгаа гэдгийг онцолсон байдаг. Энэ талаар нүүрсний Хянан шалгах түр хорооны дарга, УИХ-ын гишүүн Б.Энхбаяр "Б.Эрдэнэбат та 2013 оны тавдугаар сард Засгийн газрын тогтоолоор шууд олгосон 14 сая ам.долларын зээлнээс 4.3 сая ам.долларыг нь бэлнээр авсан байна. Ингэхдээ Нарангэрэл, Уянга гэсэн хүмүүст 3.1 сая ам.долларыг 15 удаагийн гүйлгээгээр авсан байна. Таны нягтлан Алтанчимэг 1.2 сая ам.долларыг бэлнээр авсан байна. Таны хүү Жаргалан 1.8 сая ам.долларыг дөрвөн удаагийн үйлдлээр бэлнээр мөнгө авсан байна" гэдгийг хэлсэн байдаг. Энэ мэтчлэн гурван удаагийн авсан зээлнийхээ нийт 8.6 сая ам.долларыг бэлнээр авч, зориулалтын бусаар ашигласан нь тогтоогджээ. Түр хорооны дарга, УИХ-ын гишүүн Б.Энхбаярын нотлох баримтад тулгуурласан мэдээллийг "Эрэл"-ийн Б.Эрдэнэбат бүгдийг нь хүлээн зөвшөөрч байгаагаа илэрхийлсэн. Харин 2024 онд УИХ-ын сонгуульд дэвшсэн түүний хөрөнгө орлогын мэдүүлэг нь тун сонирхолтой байдлаар гарсан. Өөрийн орлого 2 сая төгрөг, гэр бүлийн орлого 56 сая төгрөг, Үл хөдлөх 11 тэрбум, хадгаламжгүй, авлагагүй, тээврийн хэрэгсэл 430 сая, зээлгүй гэж мэдүүлжээ. Хотын төвийн хамгийн үнэтэй газрууд Б.Эрдэнэбатынх. Өөрийн туслах Т.Ганбатын нэр дээр Богдхан уулын дархан цаазат газрын тусгай хамгаалалтын бүсэд буюу Зайсангийн ам, Нүтхтийн ам, Хүүшийн аманд томоохон газруудыг ашиглах эрхийг улс төрд ид явахдаа Байгаль орчны сайд дотны найз “Эх орон” намынх нь гишүүн И.Эрдэнэбаатараас энэхүү зөвшөөрлүүдийг авч байжээ.

Бага хүү нь хүн зодож танхайрсан, том хүүгийн аллагын хэрэг?!

Ийм түүхтэй нэртэй аавын бага хүү Э.Тэмүүлэнг өнгөрсөн зун эхэндээ том ах Э.Жаргалантай нь андуурч байв. Э.Жаргалан 2000-аад оны эхэн үеийн хэвлэлийн баатар. Одоогийн “баян” Базараагийн гэргий мисс Д.Ариунцэцэг, “Эко” Нямдаваагийн дурлалт бүсгүй мисс Б.Буджаргал гэхчлэн түүний гоё хүүхний сет урт. 2012 онд хуримаа хийснээр түүний шоу романс зогссон билээ. Э.Жаргаланд автомашины осол хийж цагдаад эрэн сурвалжлагдаж байсан хэргийн бүртгэл ч бий. Хүний амь нас эрсдээгүй учраас тэгсгээд намжсан. Гэвч энэ аймшигт хар дарсан зүүд мэт хэрэг нийтэд ил боллоо.

Товч сийрүүлбэл: ... 2011 оны 6 дугаар сарын 19- ний өдөр. Энэ өдөр Филиппин улсын иргэн Террил Атиенза Сингапур- Бээжин-Улаанбаатар чиглэлийн МИАТ- ын нислэгээр Монгол Улсад газарджээ. Түүнийг тосч авсан хүн бол “Эрэл “ группын үүсгэн байгуулагч Б.Эрдэнэбатын эхнэр, (тухайн үед буюу 2011 онд) Австри улсын Өргөмжит консул асан Даваахүүгийн Сэргэлэн байсан юм. Д.Сэргэлэн түүнийг тоссон даруйдаа Хан-Уул дүүргийн 4 дүгээр хорооны нутаг дэвсгэрт байрлах Нүхтийн амын үзүүрт байдаг хаустаа авчирсан байна. Атиензагийн хуучин муу гар утас, компьютерийг нь хураан авч, гэр бүлтэй нь бүтэн таван сарын хугацаанд холбоо бариулаагүй байна.

Д.Сэргэлэн гэх энэ эмэгтэйг ямар учраас тухайн үед Өргөмжит консулаар томилсныг, яагаад гадаад иргэнийг цалин хөлсгүй ажиллуулсныг, гэр бүлийнхэнтэй нь яагаад холбоо бариулахгүй байсныг, таван сарын хугацаанд түүнийг зөвхөн зарцлаад зогсохгүй, бие сэтгэл санааны хүчирхийлэлд байлгасныг олж тогтоож заавал хуулийн хариуцлага хүлээлгэх нь маш чухал байна. Хууль хяналтынхан энэ бүх баримтыг дахин шалгах хэрэгтэй. Талийгаач эмэгтэй нөхөртэйгээ хамгийн сүүлд ярихдаа” Жаажаа намайг байнга зодож дээрэлхдэг” гэж хэлж амжжээ. Болсон үйл явцаа бүтэн ярьж амжаагүй ч ерөнхий байдлаа хэлсэн байна. Э.Жаргалан ер нь одоо хаана ямар ажил хийдэг, өмнө нь юу хийж байсан бэ? Гадаад улсад үнэтэй хаусанд амьдардаг гэсэн сошиалын мэдээллээс өөр зүйл алга. Хүний нутагт амьдрал хайж ирсэн дөрвөн хүүхдийн ээжийнх нь амь насыг хохироогоод, зүрх, бөөрийг нь аваад үлдэнэ гэхлээр ой тоонд багтамгүй?!

Ийм зүйл болж байхад олны өмнө гарч ирэхгүй нуугдаад Б.Эрдэнэбатынхан дэндүү хүн чанар, ёс зүйгүй утгаараа улны аашилж байна. Энэ хүмүүст хариуцлага тооцохыг шаардаж байна.

Б.Ундрал