Томилгоо: Сангийн яамны ТНБД асан Ж.Ганбат СЕХ-ны даргаар, түүний оронд Аудитын ерөнхий газрын дарга асан Г.Занданбатыг томилоно

Энэ долоо хоногт Засгийн газрын хуралдаанаар дэд сайдуудыг томилж төрийн албаны халаа сэлгээ үргэлжилж байна. Өчигдөр /2025.12.17/ Төрийн байгуулалтын байнгын хорооны хуралдаанаар Сонгуулийн ерөнхий хорооны дарга П.Дэлгэрнаранг  үүрэгт ажлаас нь чөлөөлсөн. Түүнийг 2020 оны наймдугаар сард Сонгуулийн ерөнхий хорооны даргаар томилсон бөгөөд бүрэн эрхийн хугацаа нь дууссан аж.

Тэгвэл түүний оронд Сангийн яамны Төрийн нарийн бичгийн даргаар ажиллаж байсан Ж.Ганбат томилогдохоор болжээ.

Ж.Ганбатыг Сангийн яамны Төрийн нарийн бичгийн даргаас мөн өчигдөр /2025.12.17/ чөлөөлсөн юм. Харин түүний оронд Аудитын ерөнхий газрын дарга асан Г.Занданбатыг томилох аж.

Ж.Ганбат  нь 2022 оноос хойш тус яамны ТНБД-аар ажилласан бөгөөд энэ хугацаанд "Эрдэнэс Тавантолгой" ХК-д Засгийн газрын бүрэн эрхт төлөөлөгчөөр томилогдон ажиллаж байсан билээ.

Харин Г.Занданбатын тухайд  Баянзүрх дүүргийн татварын хэлтэст улсын байцаагч, Татварын ерөнхий газрын Улсын төсвийн орлого, хяналтын газрын дарга, Зам, тээврийн хөгжлийн яамны Төрийн захиргаа, удирдлагын газрын дарга, мөн яамны Санхүү, эдийн засгийн хэлтсийн дарга, Хөрөнгө оруулалт, үйлдвэрийн хэлтсийн дарга, Татварын ерөнхий газрын даргын үүргийг түр орлон гүйцэтгэгчээр томилогдон ажиллаж байсан туршлагатай нэгэн.

Мөн "Эрдэнэс Монгол" ХХК-ийн гүйцэтгэх захирлаар Ерөнхий сайдын ахлах зөвлөх Б.Даваадалай томилогдохоор болжээ.  Түүний хувьд  Монгол Улсын Ерөнхийлөгч У.Хүрэлсүхийн эдийн засгийн бодлогын зөвлөхөөр ажиллаж байсан. Мөн 2024 оны УИХ-ын сонгуулийн I тойрогт МАН-аас нэр дэвшиж байсан бөгөөд Ерөнхий сайд Г.Занданшатартай нэг нутаг аж.