Цагаан сар, наадмын амралт амралтын өдөртэй давхацвал ажлын өдөр нөхөж амрах хууль батлагдсангүй

Чуулганы хуралдаанаар УИХ-ын гишүүн Б.Уянга, О.Батнайрамдал нарын өргөн мэдүүлсэн Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийг хэлэлцлээ.

Хууль санаачлагчид нийтээр тэмдэглэх баярын амралт нь амралтын өдөртэй давхацвал ажлын өдөр нөхөж амрах зохицуулалтыг хуульд оруулахаар төсөлдөө тусгасан юм. Харин хэлэлцүүлгийн шатанд зөвхөн Цагаан сар, наадмын амралт амралтын өдөртэй давхацсан тохиолдолд л ажлын өдөр нөхөж амардаг байхаар өөрчлөөд байсан билээ. Улмаар энэхүү хуулийн төслийг эцэслэн батлах санал хураалт явуулахад ирц хангалтгүй байсны улмаас олонхийн дэмжлэг авч чадалгүй уналаа.