Шүүхээс 2.6 жилийн хорих ял сонссон УИХ-ын гишүүн асан Т.Аюурсайхан энэ сард суллагдана
УИХ-ын гишүүн асан Т.Аюурсайхан анхан шатны шүүхээс гурван жилийн хорих ял авсан. Дараа нь, давж заалдах шатны шүүхээр хорих ялын хэмжээ буурч, 2 жил 6 сар болсон юм. Тэрбээр 2024 оны нэгдүгээр сарын 31-нд анх хоригдсон.
Эрүүгийн хуулийн 59 дүгээр зүйлийн 59.1 дэх хэсэгт "Шүүх цагдан хоригдсон хугацааг шүүгдэгчийн ял эдэлсэн хугацаанд оруулж тооцно" гэж заасан. Энэ дагуу, анхан шатны шүүхийн шийдвэр гарахаас өмнө цагдан хоригдсон найман сарыг нь хасахаар хоёр жил болдог. Өөрөөр хэлбэл, Т.Аюурсайхан хоёр жилийн ял эдэлж, 2026 оны нэгдүгээр сард буюу энэ сард суллагдах юм.
Чингэлтэй дүүргийг даргалж, “базаж” явсан экс гишүүн Т.Аюурсайхан, түүний найз "Эрдэнэс Тавантолгой" ХК-ийн Гүйцэтгэх захирал асан Б.Ганхуяг нарын 11 хүнд холбогдох хэргийг 2024 оны эхээр шүүх шийдвэрлэсэн байдаг. Нүүрэн дээрээ нүүрсний хэргээр ял авсан мэт боловч нэдэр дээрээ туг тахиулсан улстөрчид гэж хэлж болно.
Өөрөөр хэлбэл нүүрсний гэх тодотголтой, эзэн холбогдогч хийгээд аргумент нь тодорхой бус гагцхүү МАН-ын томчуудын хоорондох толхилцоон, хагарлаас үүдэлтэй дуулиант хэргийг эцэст нь хэн нэгнийг биш нэжгээдийг яллаж олон нийтийн амыг хаах хэрэгтэй байсан. Тэр нь Т.Аюурсайхан тэргүүтнүүд байсан хэмээн улс төрийн хүрээнд ярьдаг.
Үнэхээр ч Т.Аюурсайханыг ялласан дүгнэлт нь нүүрсний ч биш, авилгал, албан тушаалын ч биш харин үндэслэлгүйгээр хөрөнгөжсөн, мөнгө угаах, эрх мэдлээ урвуулан ашигласан зэрэг гэмт хэрэгт холбогдуулан 3 жилийн хорих ял оноосон. Уг ялыг давж заалдах шатны шүүхээс 2 жил 6 сар болгон бууруулсан байдаг.
Тэрээр өөрийгөө “хонгилдуулсан” гэж үзэж буйгаа ч хэлж байсан бөгөөд хэрвээ нүүрсний хэргээр ял авах юм бол үлдсэн амьдралаа МАН-ын хулгайч нарыг илчлэхэд зориулна гэж байсныг мартаж болохгүй. Ердөө хэдхэн хоногийн дараа суллагдаж гарч ирээд юу ярих бол, хэний хулгай луйврыг илчлэх бол? Магад тэр гартаа тэсрэх бөмбөг атгаж суугаа. Хэзээ, хэрхэн дэлбэлэх бол гэхээс МАН-ын хурган дарга нараас авахуулаад томчууд нь хүртэл айж суугаа биз ээ.
М.Үүрийнтуяа
