Тодруулга: Хяналтаас алдагдсан ДОХ-той 12 иргэний дунд урлагийнхан байгаа гэдэг нь ташаа мэдээлэл  

ДОХ-ын халдвартай 12 иргэн хяналтаас алдагдсан төдийгүй тэдний дунд урлагийнхан байгаа гэх мэдээлэл олны анхаарлын төвд байна.  Тодруулбал, өнгөрсөн долоо хоногт /2025.12.25/ Эрүүл мэндийн сайд Ж.Чинбүрэн “ДОХ-ын халдвартай 12 хүнийг хяналтаас алдсан нь үнэн. Эдгээр иргэдийг илрүүлэх нь чухал. Ганц Эрүүл мэндийн яам хүчрэхгүй учраас ХЗДХЯ, ТЕГ, ЦЕГ зэрэг байгууллагуудтай хамтарсан Ажлын хэсэг байгуулж дээрх иргэдийг илрүүлнэ. Гэхдээ өвчтэй хүний мэдээллийг нууцлах нь чухал" хэмээн мэдэгдсэн. Ажлын хэсгийн ахлагчаар Ж.Чинбүрэн сайд томилогдсон байна.

Тус ажлын хэсгийн үйл ажиллагаа болон хяналтаас алдагдсан 12 иргэнийг олж илрүүлэх ажлын явц ямар байгаа талаар тодруулахаар албаны эх сурвалжуудтай холбогдоход тодорхой мэдээлэл байхгүй байв. Өөрөөр хэлбэл, ажлын хэсгийн ахлагч Эрүүл мэндийн сайд Ж.Чинбүрэн гадаадад томилолттой байгаа бол ХӨСҮТ болон ЭМЯ-ныхан уг асуудлыг бие биерүүгээ чихсэн байдалтай байна. Харин ДОХ-ын халдвартай 12 иргэний дунд урлагийнхан байгаа гэдэг нь ташаа мэдээлэл гэсэн юм.

Жич: Монгол Улсад ХДХВ-ийн анхны тохиолдол 1992 онд бүртгэгдсэн бол хоёр дахь нь 1997, гурав дахь нь 2001 онд, дөрөв дэх нь 2003 онд бүртгэгдсэн. 2014 онд хамгийн олон буюу 31 хүн бүртгэгдсэн бол 2025 оны 11-р сарын 20-ны байдлаар 36 тохиолдол бүртгэгдэж, таван хүн энэ халдварын улмаас хорвоог орхижээ.

Судалгаагаар, Монгол Улсад халдварын 99.7 хувь бэлгийн замаар дамжсан бөгөөд халдвар авсан хүмүүсийн 83 хувь нь эрэгтэй, 14.6 хувь нь эмэгтэй. 2.4 хувь нь трансжендер байна гэсэн судалгааны дүн байдаг байна.