Д.Мөнх-Эрдэнэ: СЭМҮТ-ийн хатуу хяналтад байх ёстой хүн яагаад гадуур чөлөөтэй явах болсныг шалгаж тогтоох ёстой

Энэ оны нэгдүгээр сарын 4-ний өдөр Баянзүрх дүүргийн 27 дугаар хорооны нутаг дэвсгэрт гарсан хүн амины онц ноцтой гэмт хэргийн талаар Хууль зүй, дотоод хэргийн Дэд сайд Д.Мөнх-Эрдэнэ мэдээлэл өглөө.

Тэрбээр, "Шүүхээс эмнэлгийн чанартай албадлагын арга хэмжээ авсан. Энэ арга хэмжээний дараа болсон үйл явдалтай холбоотой эрх зүйн орчны хүрээнд засаж залруулах зүйлс байна. Эмнэлгийн чанартай албадлагын арга хэмжээ хуулийн дагуу явагдсан эсэх, шинжээчийн дүгнэлт бодитой, үнэн зөв байсан эсэхийг нягталж шалгах ёстой. Өөрөөр хэлбэл СЭМҮТ-ийн хатуу хяналтад байх ёстой хүнийг ямар үндэслэл, дүгнэлтийн хүрээнд албадлагын арга хэмжээнээс чөлөөлж гадуур сул чөлөөтэй явах нөхцөл байдал үүссэнийг шалгаж тогтоох ёстой. Иймд ХЗДХ-ийн сайдын тушаалаар шуурхай ажлын хэсэг байгуулагдаж, Эрүүгийн хуульд байгаа эмнэлгийн чанартай албадлагын арга хэмжээний үр нөлөө нь эрүүгийн хариуцлагын гол зорилгод нийцэж чадаж байна уу гэдгийг бодож эрх зүйн орчныг боловсронгуй болгох ажлыг эхлүүлж байна.Дахин ийм гэмт хэрэг гарах ёсгүй. Бид холбогдох хуулийн төслийг хаврын чуулганаар өргөн мэдүүлж батлуулахаар ажиллана" гэв.

Цагдаагийн байгууллага энэ сарын 5-ны өдрөөс хэрэг үйлдсэн иргэн Б-г цагдан хорих, таслан сэргийлэх арга хэмжээг аваад байна.

Түүнчлэн цаашид сэтгэцийн хувьд хэрэг хүлээх чадваргүй хүмүүсийг тусгайлан эмнэлгийн хяналтад байлгадаг төв Монгол Улсад зайлшгүй хэрэгтэй байна гэж салбарын сайд үзэж буйг онцлов. Улмаар шинэ тусгай төвийг байгуулах, зураг төслийг нь боловсруулах үүргийг холбогдох албан тушаалтнуудад өгөөд байгаа аж.